Kókónisti ózimiz ósiremiz, biraq saqtaı almaımyz – mınıstr

ASTANA. QazAqparat – QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın eldegi azyq-túlik óndirisi týraly pikir bildirdi, dep habarlaıdy QazAqparat tilshisi.

Mınıstr barlyq ónimder Qazaqstanda ósiriletinin, biraq kólemi jetkiliksiz ekendigin aıtty.

«Biz kartopty óz maýsymynda ımporttaımyz. Barlyq derlik ónimderdi ózimiz ósiremiz, biraq onyń kólemi jetkiliksiz. Qazir kartopty da eksporttaýǵa jetetindeı shyǵara alamyz, biraq ony sáýir aıyna deıin saqtaı almaımyz. Naýryz aıynyń sońy men sáýirde qandaı da bir elden ımporttaýymyz kerek. Ózbekstanǵa bizdiń kartop pen sábiz qajet. Olarmen kelisim jasaý úshin Ózbekstanǵa baramyz. Endi biz olarǵa kartop pen sábizdi ortalyqtan satýǵa, sodan keıin olardan naýryz-sáýir aılarynda kartop-sábiz satyp alýǵa daıynbyz, biraq munda baǵa deńgeıi qalypty bolýy kerek», - dep túsindirdi Serik Jumanǵarın Úkimet otyrysynyń aıasynda.

Sondaı-aq, Saýda mınıstri jaqynda Pákistan delegatsııasymen kezdesý ótkenin atap ótti.

Onyń aıtýynsha, kartop Pákistannan da ákelinedi.

«Eki apta buryn men Iranda boldym. Biz Irannan ne ákele alatynymyzdy talqyladyq: ónimderdiń basym bóligi – kókónister, jemister, alma, jıdekter jáne t.b.», - dedi Serik Jumanǵarın.

Buǵan deıin Serik Jumanǵarın Qazaqstanda qant tapshylyǵy bolmaıtynyn aıtqan edi.