Kókónis saqtaý qoımalaryn salatyndardy yntalandyrý tetikteri kúsheıtilmek
«Kókónis pen jemisti saqtaıtyn qajet ınfraqurylymdy qurý jumystary jalǵasyp keledi. Memleket basshysynyń tapsyrmasy boıynsha 2021 jyldan bastap 2025 jylǵa deıin kókónis qoımalaryn salý jáne jańǵyrtý jónindegi keshendi jospar ázirlenip, iske asyrylyp jatyr. Onyń aıasynda eki jylda jalpy qýattylyǵy 181,5 myń tonnalyq 36 joba josparlanǵan edi. Onyń ornyna 2021-2022 jyldary jalpy saqtaý kólemi 200,8 myń tonna bolatyn 37 joba iske asyryldy, ıaǵnı jospar 110 paıyzǵa oryndaldy», - dedi E. Qarashókeev.
Onyń aıtýynsha, bıyl paıdalanylyp jatqan ınfraqurylym qosymsha tekserildi. Máselen, júrgizilgen tekserý nátıjeleri boıynsha qazirgi kezde elimiz boıynsha 1 mln 822 myń tonna kókónis pen jemis saqtaıtyn jalpy 901 obekt bar. Sonyń arasynda 499,7 myń tonna saqtaı alatyn 257 kartop qoımasy, syıymdylyǵy 1 mln 186 myń tonna 580 kókónis qoımasy, sondaı-aq 136,9 myń tonnany qamtıtyn 64 jemis qoımasy jumys istep tur.
«Sonymen qatar, tekserý nátıjeleri boıynsha 689,8 myń tonnany quraıtyn jemis-kókónis ónimderi saqtalatyn jańa nysandardy salý kerek bolyp tur. Osy turǵyda 2023-2025 jyldarǵa arnalǵan jospar boıynsha 528,8 myń tonnaǵa ulǵaıtyldy. Ónimdi saqtaý ınfraqurylymyn qurýǵa bıznesti yntalandyrý maqsatynda Investıtsııalyq sýbsıdııalaý qaǵıdalaryna ózgeris engizilip jatyr. Bul rette paıdalanylatyn tehnologııa túrine qaraı shyǵyndardy óteý normatıvin 25 paıyzdan 40-50 paıyzǵa deıin jetkizý eskerilgen», - dedi E. Qarashókeev.
Onyń aıtýynsha, «Soltústik Qazaqstan oblysynyń tájirıbesin» taratý aıasynda qoımalardy salýǵa jeńildetilgen tártipte qarajat bólý máselesi pysyqtalyp jatyr.