Kókónis qoımalaryn salý kezindegi sýbsıdııalaý normatıvi 50 paıyzǵa ulǵaıtylmaq
Aıta keteıik, senator Rysqalı Ábdikerov Úkimet basshysyna joldaǵan depýtattyq saýalynda jemis-kókónis ónimderin saqtaıtyn arnaıy qoıma salýǵa kásipkerlerdi yntalandyrý úshin ınvestıtsııalyq sýbsıdııa men jeńildetilgen nesıe berýdi usynǵan bolatyn.
«Kókónisterdi saqtaý syıymdylyǵyn arttyrý maqsatynda Aýyl sharýashylyǵy mınıstrligi kókónis qoımalaryn salý jáne jańǵyrtý boıynsha keshendi jospar ázirledi. Josparda jyl boıynsha bólingen aýyl sharýashylyǵy ónimderiniń qoımalaryn salýǵa qatysty árbir óńir úshin naqty ındıkatorlardy aıqyndaý kózdelgen», - dedi Premer-Mınıstr.
Budan basqa onyń atap ótýinshe, josparda óńirlerdiń qoldanystaǵy qoımalardy jańǵyrtý jáne olardy zamanaýı saqtaý ınfraqurylymymen jabdyqtandyrý jónindegi jumys josparlanǵan.
«Qoımalardy qurýǵa jáne jańǵyrtýǵa ınvestıtsııalardy yntalandyrý maqsatynda josparda ónimniń taýarlyq qasıetterin saqtaı otyryp, onyń uzaq merzimdi saqtalýyn qamtamasyz etetin arnaıy jabdyǵy bar qazirgi zamanǵy qoımalardy salý kezinde sýbsıdııalaý normatıvin 25 paıyzdan 50 paıyzǵa deıin ulǵaıtý bóliginde ınvestıtsııalyq sýbsıdııalaý qaǵıdalaryna ózgerister engizý kózdeledi», - dedi Álıhan Smaıylov.
