Kókónis, alma, qulpynaı men júzim quramynda pestıtsıdter kóp

ASTANA. QazAqparat - Pestıtsıdter tek kolorada qońyzy men basqa da zııankesterge ǵana emes, sondaı-aq bal aralaryna da qaýipti. Sonyń saldarynan jylyna 200 myń adam ómirmen qoshtasady. Osy zattardyń hımııalyq jáne bıologııalyq quraýshysy fermerlerdiń aǵzasynda, sýda, topyraqta jınalyp, tipti azyq-túlik túrinde dastarhanymyzǵa keledi. Kókónisterde, jemister men dámdeýish shópterdiń quramynda pestıtsıdter kóp.

BUU-nyń adam quqyqtary jónindegi keńesiniń baıandamasynda osy másele týraly Tamaqtaný quqyǵy máseleleriniń arnaıy baıandamashysy Hılal Elver men Toksındik qaldyqtar máseleleri boıynsha arnaıy baıandamashysy Baskýt Týndjak málim etti.

BUU sarapshylary memleketterdiń qaýipti tyńaıytqyshtardy qatań baqylaýǵa alý boıynsha jańa kelisimderdi jasap, olardy aýylsharýashylyq salasynda qoldanýdan birtindep bas tartýǵa shaqyrdy.

Quqyq qorǵaýshylar atap ótkendeı, sońǵy jyldary pestıtsıdterdi aýylsharýashylyq ónimderin jándikterden, aramshópterden jáne basqa da zııankesterden qorǵaý maqsatynda qoldaný artyp keledi. Bul úrdis qorshaǵan orta men turǵyndardyń densaýlyǵyna keri áserin tıgizýde. 

BUU sarapshylarynyń baıandamasynda tyńaıytqyshtardyń qaldyqtary qorshaǵan ortaǵa, tipti azyq-túlikterde jınalyp qalatyndyǵy atalyp ótildi. Olardyń eń kóp mólsheri kókónisterde, dámdeýish shópterde jáne alma, qulpynaı jáne júzim sekildi jemisterde kezdesedi.

Sarapshylar pestıtsıdterdiń obyr, Altsgeımer jáne Parkınson aýrýlaryna shaldyǵýǵa ákep soqtyratynyn eskertýde.

Pestıtsıd aýyz sýda da jınalady eken. Mysaly, AQSh-ta jyl saıyn 70 mln. fýnt atrazın aýyz sýda qoldanylady. Sonyń saldarynan týa bitken aqaýmen aýyratyn naýqastar sany kóbeıgen. Eýropalyq odaq elderinde atrazındi qoldanýǵa 2004 jyly tyıym salynǵan, alaıda birqatar elderdiń jer asty sýlarynyń quramynda atrazın kezdesip jatady.