Kókónis alqaptary ósse de, baǵa túsken joq – mınıstr túsinikteme berdi

ASTANA. QazAqparat – Bıyl Qazaqstanda kókónis ósiretin alqaptar kólemi artty. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Bıyl elimizde jylyjaı kókónisteri kóbirek óndirildi, ıaǵnı qyzanaq pen qııardyń kólemi artty. Osy kókónisterdiń kóterme baǵasy negizinen 500-600 teńgeden aspaıdy, bul kásiporyndar beretin baǵa. Keıin saýda jelilerinde buǵan ústeme qosylady, sondaı-aq deldaldar de kóbeıip ketken. Bul baǵytta Úkimet tıisti jumysty atqaryp jatyr. Osy oraıda deldaldardy shettetý jumystary eskerilgen. Jyl saıyn kókónis ósiretin alqaptar ulǵaıyp keledi», - dedi E. Qarashókeev Májilistegi baspasóz máslıhatynda tilshiler suraǵyna jaýap bere otyryp.

Osy oraıda ol ne sebepti keıbir kókónis túrleriniń baǵasy eselep óskenin túsindirdi.

«Saýda jelilerin aralaǵan kezde, olardyń keıbireýinde baǵanyń eselep óskenin baıqadyq. Bul turǵyda eki máseleni eskerý kerek. Birinshiden, bizge shekaralas memleketterden keletin ımporttyq qyzanaqtar bar. Bul ónim elimizge jetkizilgende, deldaldar paıda bolady. Al elimizde ósirilgen ónimniń baǵasy kóbine 500-600 teńge. Bul jerde Saýda mınıstrligimen birge, sondaı-aq baqylaýshy jergilikti atqarýshy organdarmen birge osy ústeme baǵany baqylaý qajet», - dedi mınıstr.