Kóknár tuqymyn azyq-túlik retinde satqan: Pavlodarda esirtki bıznesi áshkerelendi
ASTANA. KAZINFORM - Pavlodar qalasynda esirtki quraldarynyń zańsyz aınalymy jáne qylmystyq kiristerdi zańdastyrý isi boıynsha sot úkimi shyqty, dep habarlaıdy QR Qarjylyq monıtorıng agenttigi.
Agenttiktiń baspasóz qyzmetiniń habarlaýynsha, tergep-tekserýdi QMA Pavlodar oblysy boıynsha departamenti júrgizdi. Z.F. Alekperovtiń esirtki zattary qosylǵan kóknár tuqymdaryn azyq-túlik ónimi retinde kórsetip, zańsyz ótkizýdi uıymdastyrǵany anyqtaldy.
Qylmystyq shemaǵa kúdiktiniń jaqyn týystary da qatysqan. Olardyń arasynda jetkizý, saqtaý, býyp-túıý jáne ótkizý mindetteri bólingen. Ónimder basqa óńirden logıstıkalyq kompanııalar arqyly jetkizilip otyrǵan. Satý kóknár tuqymy men dámdeýishter retinde júzege asyrylǵan.
Tintý barysynda esirtki zattary aralastyrylǵan kóknár tuqymdarynyń býyp-túıilgen partııalary tárkilendi.
Qarajat qolma-qol aqsha túrinde de, bank aýdarymdary arqyly da qabyldanǵan.
Qylmystyq jolmen alynǵan tabysqa uıymdastyrýshy eki avtokólik satyp alyp, olardy jasyrý maqsatynda úshinshi tulǵalardyń atyna rásimdegen.
Sot úkimimen Alekperov pen onyń eki sybaılasyna 7 jyldan bas bostandyǵynan aıyrý jazasy taǵaıyndaldy. Avtokólikter memleket kirisine tárkilendi.
Sondaı-aq quramynda esirtki zattary bar 321 keli kóknár tuqymy joıyldy.
Úkim zańdy kúshine endi.
Osyǵan deıin Aqmola oblysynda kóknár tuqymyn satqany úshin 2 tulǵa on jylǵa bas bostandyǵynan aıyrylǵany týraly jazdyq.
