«Kóknár-2012» aldyn alý sharasy barysynda iri kólemdegi esirtki tárkilendi - ІІM
ASTANA. 13 maýsym. QazAqparat - Ótken aptada ІІM Esirtki bıznesine qarsy kúres komıtetiniń, Kóliktegi ishki ister departamenti Esirtki bıznesine qarsy kúres basqarmasynyń jáne Lýgovoı stansasyndaǵy jelilik ishki ister bóliminiń qyzmetkerleri «Kóknár-2012» jáne «Shyǵys-Arna» jedel aldyn alý is-sharalaryn júzege asyrdy.
Onyń barysynda iri kólemdegi esirtki zattary tárkilendi. Bul týraly búgin QR Іshki ister mınıstrliginde ótken dástúrli brıfıng barysynda málim boldy.
«Atap aıtqanda, «Tátti-Quraǵatty» beketinen 3655 shaqyrym jerde Ońtústik Qazaqstan oblysynyń 55 jastaǵy turǵyny quryqtaldy. Ustalǵan azamattan daıyndalǵan salmaǵy 690 keli «marıhýana» esirtki zaty tárkilendi. Ótkizilgen is-sharalar barysynda sol kúni atalmysh aralyqtyń 3657 shaqyrymynda esirtki qylmysy úshin buryn sottalǵan Taraz qalasynyń 54 jastaǵy taǵy bir turǵyny ustaldy. Odan 410 keli marıhýana tárkilengen», - deıdi ІІM baspasóz qyzmetiniń basshysy Nurdildá Oraz. Sonymen qatar, jelilik ishki ister bóliminiń qyzmetkerleri «Boraldaı - Almaty-1» beketiniń aralyǵyndaǵy 351 shaqyrymda Almaty qalasynyń 48 jastaǵy turǵynyn qolǵa túsirdi. Ol azamattan 24 keli marıhýana tárkilengen.
