Kókke kóz tikken kún: Baıserkede avıatsııa merekesi dúrkirep ótti
ASTANA. KAZINFORM — Almaty oblysynyń Іle aýdanyndaǵy Baıserke aýylynda «Baıserke aspany – 2026» avıatsııalyq merekesi ótip jatyr. Ashyq aspan astyndaǵy aýqymdy shara avıatsııa áýesqoılary men sala mamandaryn ǵana emes, óńir turǵyndary men qonaqtaryn da bir alańǵa jınady.
Mereke aıasynda ótken baspasóz májilisinde Qazaqstandaǵy shaǵyn avıatsııany damytý, jastardy tehnıkalyq mamandyqtarǵa baýlý, avıatsııalyq mádenıetti qalyptastyrý jáne Almaty oblysynyń týrıstik áleýetin arttyrý máseleleri talqylandy.
Jıynǵa «SP „Báıterek“ AQ basqarma tóraǵasy, Qazaqstannyń Halyq qaharmany, ushqysh-ǵaryshker Aıdyn Aıymbetov, „Otan“ aeroklýby qoǵamdyq birlestiginiń basshysy ıÝrıı Eltsov, „Tıan-Shan“ avıatsııalyq ushý ortalyǵynyń bas dırektory Vladımır Antsýpov jáne Qazaqstandyq shaǵyn avıatsııa qaýymdastyǵynyń prezıdenti Ómirbek Keńesbaev qatysty.
Sala mamandary avıatsııany tek kásibı baǵyt retinde qarastyrý jetkiliksiz ekenin atap ótti. Olardyń pikirinshe, mundaı sharalar jastardyń tehnıka men ınjenerııaǵa qyzyǵýshylyǵyn arttyryp, bolashaq mamandyǵyn tańdaýǵa jol ashady.
— Ásirese, balalar men jasóspirimderdi avıatsııa álemimen erte tanystyrýdyń mańyzy aıtyldy. Áýe tehnıkasyn óz kózimen kórý, ushqyshtar men ınjenerlermen tildesý, áýe kemeleriniń jumysymen tanysý — jas býynnyń kásibı baǵdaryn qalyptastyrýǵa yqpal etetin mańyzdy tájirıbe, — dep habarlady Almaty oblysynyń ákimdigi.
Baspasóz májilisinen keıin merekeniń negizgi baǵdarlamasy bastaldy. Baıserke aspanynda áýe kemeleri qalyqtap, jerde túrli avıatsııalyq tehnıka kópshilik nazaryna usynyldy. Kelýshiler ushaqtardy jaqynnan kórip, mamandardan olardyń erekshelikteri men avıatsııalyq mamandyqtar týraly aqparat aldy.
Sharaǵa balalardyń qyzyǵýshylyǵy erekshe boldy. Uıymdastyrýshylardyń aıtýynsha, merekeniń basty mindetteriniń biri — jasóspirimderdiń aspan álemine degen qyzyǵýshylyǵyn naqty bilimge jáne bolashaq kásibı baǵdarǵa ulastyrý.
Sonymen qatar «Baıserke aspany — 2026» shaǵyn avıatsııany damytýǵa jáne avıatsııalyq mádenıetti qalyptastyrýǵa arnalǵan alań retinde de mańyzdy. Mamandardyń pikirinshe, bul baǵytty damytý úshin ınfraqurylymmen qatar, qoǵamǵa avıatsııanyń múmkindikteri týraly keńinen aqparat berý jáne kópshilikke arnalǵan is-sharalardy turaqty ótkizý qajet.
— Avıatsııalyq mereke Almaty oblysynyń týrıstik áleýetin tanytýǵa da baǵyttalǵan. Óńirdiń tabıǵı erekshelikteri men keńistigi avıatsııalyq týrızmdi damytýǵa múmkindik beredi. Osy turǵydan alǵanda, Baıserkedegi shara áýe tehnıkasynyń kórsetilimi ǵana emes, óńirdi jańa qyrynan tanytatyn týrıstik alańǵa da aınalyp otyr. «Baıserke aspany — 2026» merekesinde avıatsııanyń kásibı qyry, tehnıkanyń áserli kórsetilimi jáne tanymdyq baǵdarlamalar toǵysty. Kelýshiler úshin bul — áýe álemin jaqynnan tanýǵa múmkindik bolsa, jastar úshin bolashaq mamandyǵyn tańdaýǵa yqpal etetin mańyzdy tájirıbe. Búgin Baıserke aspanyna qyzyǵa kóz tikken balalardyń arasynan erteń eldiń jańa ushqyshtary, avıatsııa ınjenerleri men tehnık mamandary shyǵýy ábden múmkin, — delingen habarlamada.
Eske salaıyq, buǵan deıin Kólik mınıstri Nurlan Saýranbaev avıatsııa salasyna jyl saıyn 500 maman qajet ekenin aıtqan edi.
