Qoqysty jáshikke saldy: Qyzylordada kópshilikti súısintken búldirshin marapattaldy

QYZYLORDA. KAZINFORM — Áleýmettik jelide Qyzylorda qalasyndaǵy saýda ortalyǵynyń aldynda jerge shashylǵan qoqysty jınap, jáshikke salyp jatqan balaqaıdyń beınejazbasy keńinen tarady.

Talaı adamǵa úlgi bolarlyq áreketimen kópshilikti súısindirgen Ázızhan Seriktiń jasy áli úshke tolmaǵan. Beınejazbany anasy Aızat Jumaǵalı otbasymen birge kınodan shyqqan kezde túsirip alǵan eken.

— Taksıge barar jolda balam jerde jatqan qoqysty birinen keıin birin kóterip, jáshikke aparyp tastady. Ázızhannyń tili kesh shyǵyp keledi. Sondyqtan onyń árbir áreketin, qylyǵyn jıi vıdeoǵa túsirýdi ádetke aınaldyrǵanmyn. Al jan-jaǵyn tazalap júrýdi ájesinen úırengen. Vıdeony ázil-shyny aralas «ekinshi Mashbekuly (Qyzylorda oblysynyń ákimi — avt.) ósip kele jatyr» dep týystar men dostardyń WhatsApp tobyna ǵana saldym. Olar birinen birine taratyp, ulym bir kúnde tanymal bop shyǵa keldi, — dedi ol.

Osydan keıin «Qyzylorda tazalyǵy» mekemesiniń basshylyǵy búldirshindi arnaıy marapattattady.

— Osy úlgili áreket bizdi de beıjaı qaldyrmady. «Qyzylorda tazalyǵy» ujymy Ázızhandy ata-anasymen birge mekememizge arnaıy shaqyryp, alǵys bildirdik. Kishkentaı bolsa da onyń sanaly qadamy úlken-kishige birdeı úlgi. Tazalyqtyń bastaýy jaýapkershilikte, al Ázızhan — osynyń jarqyn dáleli, — dedi kásiporyn dırektory Saparǵalı Asylbekov.

Aıta keteıik, jaqynda Jetisý oblysynda «Zań men Tártip» qaǵıdaty jáne «Taza Qazaqstan» aktsııasy aıasynda tártip pen tazalyqty dáripteıtin mýral ashyldy.