Qoqysty suryptaý jáne qaıta óńdeý boıynsha 15 joba iske qosyldy
ASTANA. KAZINFORM — Qaldyqtardy basqarý salasynda 2024 jyldan beri jalpy quny 350 mlrd teńgege jýyq 67 joba maquldandy. Onyń 15-i júzege asyrylyp, 500-den astam jumys orny ashyldy. Bul týraly Ortalyq kommýnıkatsııalar qyzmetinde ótken baspasóz máslıhatynda Ekologııa jáne tabıǵı resýrstar vıtse-mınıstri Jomart Álıev málimdedi.
Vıtse-mınıstrdiń aıtýynsha, jobalar qoqys tasıtyn kólikterdi jańartýǵa, qaldyqtardy suryptaý jáne qaıta óńdeý nysandaryn salýǵa, qoldanystaǵy kásiporyndardyń qýatyn arttyrýǵa baǵyttalǵan.
— Іske asyrylǵan 15 joba aıasynda 131 qoqys tasıtyn kólik satyp alyndy. Jylyna 290 myń tonna qaldyqty suryptaıtyn úsh nysan, sondaı-aq eski shınalar men makýlatýrany qaıta óńdeıtin úsh nysan iske qosyldy. Sońǵy úsheýiniń jalpy qýaty jylyna 19,3 myń tonnany quraıdy. 500-den astam jumys orny ashyldy, — dedi Jomart Álıev.
Atap aıtqanda, qoqys tasıtyn kólikterdi satyp alý boıynsha toǵyz joba Almaty, Shymkent, Óskemen, Aqtaý, Stepnogorsk, Rýdnyı, Atyraý jáne Qulsary qalalarynda júzege asyryldy. Onyń ekeýi Stepnogorskige tıesili.
Qaldyqtardy suryptaý nysandary Pavlodar men Rýdnyı qalalarynda jáne Qyzylorda oblysynda paıdalanýǵa berildi. Al Shymkent pen Rýdnyıda eski shınalardy, Túrkistan oblysynda makýlatýrany qaıta óńdeıtin nysandar iske qosyldy.
Jomart Álıevtiń aıtýynsha, josparlanǵan 67 jobanyń barlyǵy aıaqtalǵanda jalpy sany 178 arnaıy tehnıka satyp alynyp, qaldyqtardy suryptaý qýaty jylyna 2,3 mln tonnaǵa, qaıta óńdeý qýaty 1,1 mln tonnaǵa artady. Bul kórsetkishterge iske asyrylǵan jobalar da kiredi.
Buǵan deıin qaldyqtardy qaıta óńdeýdi damytýǵa 122 mlrd teńgeden astam qarjy bólingeni habarlanǵan edi.
