Qoqysty podezge qaldyrǵandar, qansha aıyppul tóleıdi
ASTANA. KAZINFORM — Qoqys salynǵan paketti podezge qaldyrý, saıabaqta bótelke tastaý nemese qoqysty jáshiktiń janyna qoıý — qalany lastap qana qoımaı, zań buzýshylyq bolyp sanalady, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
Qazaqstan Respýblıkasy Ákimshilik quqyq buzýshylyq týraly kodeksiniń 434-2-babyna (Qoǵamdyq oryndardy lastaý) sáıkes, kommýnaldyq qaldyqtardy belgilenbegen oryndarǵa tastaǵany úshin ákimshilik jaýapkershilik kózdelgen.
— Alǵash ret quqyq buzǵan jaǵdaıda 10 AEK (43 250 teńge) mólsherinde aıyppul salynady nemese 40 saǵatqa deıin qoǵamdyq jumystarǵa tartylady. Bir jyl ishinde quqyq buzýshylyq qaıtalansa, 20 AEK (86 500 teńge) mólsherinde aıyppul salynady nemese 80 saǵatqa deıin qoǵamdyq jumystarǵa tartylady, — dep túsindirdi mınıstrlik.
Vedomstvo atap ótkendeı, qoqysty arnaıy konteınerge aparyp tastaý qomaqty aıyppul tóleýden áldeqaıda ońaı ári tıimdi.
— Barlyq turǵyndy qorshaǵan ortaǵa jaýapkershilikpen qaraýǵa, tazalyqty saqtaýǵa jáne qaldyqtardy tek arnaıy belgilengen oryndarǵa tastaýǵa shaqyramyz, — dep eskertti Ekologııa mınıstrligi.
Buǵan deıin qoqysqa tastalǵan dáriler tabıǵatqa qalaı áser etetinin jazdyq.
