Qoqysty óńdeý: EkoQoldaý baǵdarlamasyna bıyl 9,2 mlrd teńge bólinedi

ASTANA. KAZINFORM — Elimizde qaldyqtardy jınaý jáne qaıta óńdeý kásiporyndaryn yntalandyrý maqsatynda «EkoQoldaý» baǵdarlamasyna bıyl 9,2 mıllıard teńge qarastyryldy. Bul týraly Ekologııa jáne tabıǵı resýrstar mınıstri Erlan Nysanbaev aıtty.

— Ótken jyldan bastap mınıstrlik qaldyqtardy jınaý jáne qaıta óńdeý kásiporyndaryn yntalandyrý maqsatynda «EkoQoldaý» baǵdarlamasyn qaıta iske qosty. Bıyl osy tólemderge 9,2 mıllıard teńge qarastyryldy, — dedi ol Úkimet otyrysynda.

Mınıstrdiń aıtýynsha, polımer qaldyqtarynyń jınalǵan jáne qaıta óńdelgen ár tonnasy úshin bıyl tólem somasy 71 myń teńgeden asady.

— Biz qaldyqtardy qaıta óńdeýdiń menshikti júıesi bar óndirýshiler men ımporttaýshylardy ýtılalym tóleýden bosatý talaptaryn jeńildettik. Atap aıtqanda menshiktegi mindetteme tek qaıta óńdeý jabdyqtaryna qoldanylady, al ǵımarattar nemese kólik quraldary jalda bolýy nemese aýtsorsıngke berilýi múmkin, — dep túıdi sózin vedomstvo basshysy.

Aıta ketelik qoqys óńdeý salasynda 316,9 mlrd teńgeniń 67 jobasy maquldandy.