Qoqysty qaıta óńdeý jobalaryna bólinetin qarjy 385 mlrd teńgege deıin ulǵaıtylmaq
ASTANA. KAZINFORM — Qaldyqtardy basqarý salasyndaǵy jobalardy qarjylandyrý kólemin 385 mlrd teńgege deıin arttyrý josparlanyp otyr. Sondaı-aq jeńildetilgen qarjylandyrý baǵdarlamasyn 2030 jylǵa deıin uzartý kózdelgen. Bul týraly Ortalyq kommýnıkatsııalar qyzmetinde ótken baspasóz máslıhatynda Ekologııa jáne tabıǵı resýrstar vıtse-mınıstri Jomart Álıev málimdedi.
Vıtse-mınıstrdiń aıtýynsha, baǵdarlamaǵa kásipkerler tarapynan suranys joǵary. Qazir maquldanǵan jobalardyń jalpy quny 349,8 mlrd teńge. Al baǵdarlamanyń qazirgi qarjylandyrý kólemi — 185 mlrd teńge. Jobalardyń jalpy quny qarastyrylǵan qarajattan eki esege jýyq kóp.
— Óńirlerdiń qoqys tasıtyn kólikter parkin jańartý, jańa suryptaý jelileri men qaıta óńdeý nysandaryn iske qosý qajettiligin eskere otyryp, qarjylandyrý kólemin 385 mlrd teńgege deıin ulǵaıtý josparlanyp otyr. Sonymen qatar baǵdarlamany 2030 jylǵa deıin uzartý jáne aýdandyq, aýyldyq eldi mekenderde jumys isteıtin memlekettik kommýnaldyq kásiporyndarǵa óz úlesin qospaı qatysýǵa múmkindik berý kózdelgen, — dedi Jomart Álıev.
Budan bólek, 2031 jyldan bastap qaıtarylǵan nesıe qarajatyn jańa jobalarǵa baǵyttaý josparlanǵan. Buryn berilgen qaryzdar qaıtarylǵan saıyn sol qarajat basqa jobalardy qarjylandyrýǵa jumsalady.
Vıtse-mınıstrdiń aıtýynsha, iri qalalarda qoqys óńdeý zaýyttaryn salý jobalary kádege jaratý tólemi esebinen jeńildetilgen qarjylandyrý tetigi arqyly qoldaý taýyp keledi.
Bul jumys Memleket basshysynyń 2024 jylǵy 7 aqpandaǵy tapsyrmasyna sáıkes, Úkimettiń 2021 jylǵy № 604 qaýlysy aıasynda júrgizilip jatyr.
Qazir Ónerkásipti damytý qory arqyly jyldyq 3 paıyzben 3 jyldan 15 jylǵa deıingi merzimge nesıe beriledi.
Qarajat negizinen otandyq qoqys tasıtyn kólikterdi satyp alýǵa, suryptaý keshenderi men qaıta óńdeý nysandaryn salýǵa baǵyttalady.
Buǵan deıin qoqysty qaıta óńdeý salasynda jalpy quny 349 mlrd teńge bolatyn 67 joba maquldanǵany habarlanǵan edi.
