Qoqysty qaldyqsyz óńdeıtin tehno-ekopark zaýyty salynatyn boldy
ASTANA. KAZINFORM - «ADC TAZA A'LEM» JShS turmystyq qaldyqtardy óńdeý jónindegi tehno-ekopark zaýytyn salý jónindegi alǵashqy jobasyn iske asyrýdy bastady, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
Aǵymdaǵy jyldyń aqpan aıynda Memleket basshysy ınvestorlardy tarta otyryp, qaldyqtardy óńdeıtin zaýyttar salýdy tapsyrdy.
Osy tapsyrma aıasynda Úkimet qaıta óńdeý tólemderin paıdalana otyryp, qaldyqtardy basqarý salasynda 94 ınvestıtsııalyq jobanyń pýlyn qalyptastyrdy. Barlyq jobalar múddeli taraptarmen, atap aıtqanda ákimdiktermen jáne bıznes-qaýymdastyqtarmen kelisildi.
Joǵaryda atalǵan jobalardy júzege asyrý kommýnaldyq qaldyqtardy qaıta óńdeý deńgeıin qazirgi 1 mln tonnadan jylyna 2,2 mln tonnaǵa deıin arttyrýǵa múmkindik beredi.
24 shildede Qazaqstan Respýblıkasynyń Ekologııa jáne tabıǵı resýrstar mınıstrligi men «Jasyl damý» AQ «ADC TAZA A'LEM» JShS QTQ óńdeý jónindegi tehno-ekopark zaýytyn salý jónindegi alǵashqy jobany iske asyrýdy bastaý rásimine qatysty.
Joba jylyna 120 myń tonna qatty turmystyq qaldyqtardy suryptaýdy, organıkalyq qaldyqtardy qaıta óńdeýdi (80 myń tonna/jylyna) qarastyrady. 70 jańa jumys ornyn ashý josparlanýda.
Qaldyqtardy basqarý salasyndaǵy mundaı jobalardyń tolyq júzege asyrylýy aımaqtardyń ekologııalyq jáne ekonomıkalyq jaǵdaıyn jaqsartýǵa múmkindik beredi.
