Qoqysqa tastalǵan dáriler tabıǵatqa qalaı áser etedi
ASTANA. KAZINFORM — Almatyda 1,2 tonnaǵa jýyq merzimi ótken dári-dármek jınalyp, qaýipsiz jolmen joıyldy. Bul týraly «Eco Almaty» JShS mamandary aıtty.
Almatydaǵy 38 qalalyq emhanada merzimi ótken dári-dármekterdi jınaýǵa arnalǵan arnaıy konteınerler ornatylǵan. Byltyr jazdan beri bir jyl ishinde turǵyndar osy konteınerlerge 1 200 kelige jýyq dári-dármek qaldyǵyn tapsyrdy. Jınalǵan qaldyqtar qaýipsiz jolmen joıýǵa jiberildi.
Jobany ECO Network ekologııalyq qaýymdastyǵy STADA farmatsevtıkalyq kompanııasymen birlesip júzege asyryp keledi. Ornatylǵan konteınerlerdiń arqasynda turǵyndar jaramdylyq merzimi ótken dári-dármekterdi turmystyq qoqystan bólek jınaýǵa tapsyrady.
Dári-dármek jınaý pýnktteriniń jumysyn baǵalaýǵa Satbayev University stýdentteri qatysty. Eriktiler 34 emhanany aralap, turǵyndardyń joba týraly habardar bolýyn jáne medıtsına qyzmetkerleriniń bastamaǵa qatysý belsendiligin baǵalady. Tekserilgen emhanalardyń 70%-dan astamy joǵary nátıje kórsetti.
Eske salaıyq, shilde aıynda dári-dármek jınaý boıynsha № 1 qalalyq emhana kósh bastap, 79,5 keli qaldyq jınady. Úzdik bestikke № 23 emhana — 71,45 keli, № 4 emhana — 70,2 keli, № 17 emhana — 66,6 keli jáne № 12 emhana — 65,6 keli kórsetkishpen endi.
— Merzimi ótken dárilerdi bólek jınaý qorshaǵan ortanyń lastaný qaýpin azaıtýǵa kómektesedi. Turmystyq qoqysqa tastalǵan nemese káriz júıesine tógilgen dárilik zattar topyraq pen sýǵa túsýi múmkin, — dep túsindirdi mamandar.
Uıymdastyrýshylardyń aıtýynsha, arnaıy konteınerler mundaı qaldyqtardy bólek jınap, qaýipsiz jolmen joıýǵa jiberýge múmkindik beredi.
Budan buryn merzimi ótken dárilerdiń 7,5 myń ret satylǵany anyqtaldy.
