Qoqys jáshiginen tabylǵan náresteniń anasy kinásin moıyndady
ASTANA. KAZINFORM — Jambyl oblysynda qoqys jáshiginen jańa týǵan náreste tabylǵan oqıǵaǵa qatysty áıel anyqtalyp, polıtsııaǵa jetkizildi. Ol kinásin moıyndady. Bul týraly Jambyl oblystyq polıtsııa departamentiniń baspasóz qyzmeti habarlady.
Jańa týǵan náreste Qordaı aýdanyndaǵy Gvardııa garnızony aýmaǵyndaǵy qoqys jáshiginen tabylǵan. Qazirgi ýaqytta sábı medıtsınalyq mekemede. Onyń jaǵdaıy turaqty, ómirine qaýip tónip turǵan joq.
Polıtsııa jańa týǵan náresteni tastap ketý faktisi boıynsha qylmystyq is qozǵady.
— Sotqa deıingi tergeý nátıjeleri boıynsha tıisti protsessýaldyq sheshim qabyldanady. QR Qylmystyq is júrgizý kodeksiniń 201-babyna sáıkes, ózge aqparat jarııalanbaıdy, — dep habarlady vedomstvo.
Aıta keteıik, buǵan deıin Jambyl oblysyndaǵy qoqys jáshiginen jańa týǵan náreste tabylǵany habarlanǵan bolatyn.
