Qoqys suryptaý: Astana men Jezqazǵan mektepterine 1000-nan asa ekoboks ornatylady
ASTANA. KAZINFORM — Elimizde qoqysty bólek jınaý júıesi qarqyndy túrde engizilip jatyr, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn jáne ózge de tapsyrmalaryn júzege asyrý sheńberinde Qazaqstanda qoǵamda qaldyqtardy kádege jaratý ádetin qalyptastyrý jáne qoqysty bólek-bólek jınaý júıelerin engizý boıynsha jumystar júrgizilip jatyr.
Qalalarda qaıta óńdeletin shıkizatty qabyldaıtyn ekobokstar men fandomattar qarqyndy túrde engizilip keledi. Oǵan plastık pen alıýmınıı tapsyrǵan azamattar bonýstarmen kótermelenedi. Qazirdiń ózinde jekemenshik bıznes ıeleri Astana, Almaty, Aqtóbe jáne Óskemen sııaqty iri qalalarda 100-den astam fandomat ornatty.
— Budan basqa, tamyz aıynyń sońyna deıin pılottyq joba aıasynda Astana men Jezqazǵannyń 129 mektebinde qoqysty bólek-bólek jınaýǵa arnalǵan 1000-nan astam ekoboks ornatylady,— dep atap ótti ekologııa jáne tabıǵı resýrstar mınıstri Erlan Nysanbaev.
Onyń aıtýynsha bul sharalar polıgondarǵa jiberiletin qaldyq kólemin azaıtýǵa múmkindik beredi jáne sonymen qatar ósip kele jatqan urpaqtyń ekologııalyq sanasyn damytýǵa kómektesedi.