Qoqys, shuńqyr, jaryqsyz kóshe: bárin TazaQazBot arqyly habarlaýǵa bolady
ASTANA. KAZINFORM — Qaladaǵy qoqys, búlingen jol nemese istemeıtin kóshe shamy týraly endi bir foto arqyly habarlaýǵa bolady. TazaQazBot chat-boty arqyly túsken 24 myńnan astam ótinishtiń 91,8%-y oryndalǵan.
2024 jylǵy maýsym aıynan bastap jumys istep kele jatqan TazaQazBot chat-boty turǵyndarǵa qalalardyń ekologııalyq jaǵdaıyn jaqsartýǵa, abattandyrý deńgeıin arttyrýǵa jáne qoǵamdyq keńistikterdiń jaı-kúıine qatysty máselelerdi jedel habarlaýǵa múmkindik beredi.
Turǵyndar zańsyz qoqys úıindileri, qoqys konteınerleriniń tolyp ketýi, kóshe jaryǵynyń isten shyǵýy, jol jamylǵysynyń búlinýi jáne ózge de abattandyrý máseleleri týraly chat-bot arqyly habarlaı alady.
Ótinish joldaý úshin anyqtalǵan máseleniń fotosýretin tirkep, ornalasqan jerin kórsetip, qysqasha sıpattama berý qajet. Kelip túsken ótinishter qaraý jáne tıisti sharalar qabyldaý úshin quzyretti memlekettik organdarǵa joldanady.
Chat-bot iske qosylǵannan beri barlyǵy 24 myńnan astam ótinish kelip túsken. Onyń ishinde 22 myńnan kóp ótinish oryndaldy, bul jalpy ótinishterdiń 91,8%-yn quraıdy.
TazaQazBot – turǵyndar men memlekettik organdar arasyndaǵy ózara baılanysty nyǵaıtýǵa, qalalyq ınfraqurylymnyń jaı-kúıin jaqsartýǵa jáne qorshaǵan ortanyń tazalyǵyn saqtaýǵa baǵyttalǵan tıimdi qural.
Qalalarymyzdyń tazalyǵy men jaılylyǵyn qamtamasyz etý – ortaq mindet. Árbir turǵynnyń belsendiligi men jaýapkershiligi qolaıly ári qaýipsiz qalalyq ortany qalyptastyrýǵa yqpal etedi.
