Qoqys ákelip, balmuzdaq al: Kentaýda «Taza Qazaqstan» baǵdarlamasy jańa formatta ótip jatyr
TÚRKІSTAN. KAZINFORM - «Taza Qazaqstan» ekologııalyq baǵdarlamasy aıasynda Kentaý qalasynda senbilikter jańashyl ári qyzyqty formatta ótýde.
Senbilik jumystaryna qaladaǵy 30-ǵa jýyq mekemeden 500-deı qyzmetker, eriktiler men turǵyndar belsene qatysty. Nátıjesinde 12 arnaıy tehnıka arqyly 50 tonnaǵa jýyq qoqys qala aýmaǵynan shyǵaryldy.
Bul shara tek senbilikpen shektelmeı, jas urpaqqa tabıǵatty aıalaýdy úıretetin jarqyn bastama boldy. Aýlalar kúl-qoqystan tazartylyp, jabaıy shópterden aryldy. Balalar da bul iske belsene atsalysty.
Іs-sharanyń eń erekshe tusy – plogıng formatyndaǵy ekologııalyq aktsııa boldy. Balalar men jastar belsendi túrde qatysyp, árbir ákelgen qoqys úshin balmuzdaq aldy.
Aıta keteıik, budan buryn Túrkistan oblysynda qoqys jınaýdan jarys ótkenin jazǵan bolatynbyz.