Kókirekbaev Jambyl oblysynda jyl saıyn 10 aýyldy kórkeıtýdi usyndy
Ótken aptada K.Kókirekbaev Moıynqum aýdanynda is-saparmen bolǵandyǵy belgili. Іs-sapar barysynda oblys basshysy aýdandaǵy Elbasymyzdyń «Rýhanı jańǵyrý: bolashaqqa baǵdar» baǵdarlamalyq maqalasy aıasynda júzege asyp jatqan is-sharalarmen tanysty: - «Rýhanı jańǵyrý» túptiń túbinde barlyq salanyń, tutas elimizdiń jańǵyrýyna alyp keledi. Mine, Elbasy oılarynyń tereńdigi de, kóregendigi de osynda, - dedi aımaq basshysy.
Іs-sapar aıasynda oblys basshysy kelesi jyldan bastap Jambyl oblysynyń 10 aýyly «Týǵan jer» baǵdarlamasy boıynsha kórkeıtiletindigin aıtty. Onyń aıtýynsha, ár aýdannan bir aýyl tańdalynyp, sol aýyldardan shyqqan kásipkerler, qaltaly azamattar, sonymen qatar, ınvestorlar birigip týǵan jerlerin kórkeıtýge atsalyspaq. Bul jobany júzege asyrýǵa bıýdjetten bir tıyn jumsalmaıtyndyǵy da belgili boldy.
Jobanyń maqsaty - oblystaǵy aýyldardy qazirgi zamanǵa saı damytý.
Kelesi jyly biz 10 aýyldy kórkeıtýdi kózdep otyrmyz, 2019 jyly 20 aýyldy qamtýymyz kerek. Meniń oıymsha, oblystan shyqqan kásipker azamattar óziniń týǵan jeriniń damýyna atsalysýy perzenttik paryzy. Al eger biz osy jobany respýblıkaǵa usynyp, elimizdiń basqa aımaqtarynan qoldaý tapsaq, kelesi jyly Qazaqstan boıynsha 160 aýyldy, 2019 jyly 320 aýyldy ınvestorlar men kásipkerler arqyly keshendi túrde jańǵyrtytýǵa múmkindik alar edik, - dedi K.Kókrekbaev.
Bul joba boıynsha baǵdarlamaǵa engen aýyldarǵa jańa kósheler, saıabaqtar, sport alańdary salynyp, áleýmettik nysandardy kúrdeli jóndeýden ótkizý josparlanýda. Sonymen birge, aýyl kóshelerin jaryqtandyrý, sáýlettik kórkin jaqsartý jáne taǵy basqa keshendi jumystar atqarý kózdelýde.
Jambyl oblysynda atalǵan jobany júzege asyrý bastalyp ketkendigi de belgili boldy. Qazirgi ýaqytta jobaǵa Moıynqum aýdanynan Kumózek aýyly, Talas aýdanynan Aqkól aýyly enip otyr eken. Qalǵan 8 aýyl jaqyn arada anyqtalmaq.
