Qoqıqazdardyń mekenin saqtaý úshin Qorǵaljynǵa 40 mln tekshe metr sý jiberildi
ASTANA. KAZINFORM — Qorǵaljyndaǵy kólderge 40 mln tekshe metr sý baǵyttaldy, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
«Qazsýshar» RMK Teńiz-Qorǵaljyn kólder júıesiniń sý teńgerimin saqtaý jáne bıologııalyq ártúrlilikti qorǵaý maqsatynda jyl saıyn júrgiziletin tabıǵatty qorǵaý maqsatyndaǵy sý jiberý jumystaryn júrgizdi. Osy maqsatqa 40 mln tekshe metr sý jiberildi. Jumystarǵa kásiporynnyń úsh fılıaly — «Q. Sátbaev atyndaǵy kanal» fılıaly, sondaı-aq Qaraǵandy jáne Aqmola fılıaldary qatysty. Teńiz-Qorǵaljyn kólder júıesi Qorǵaljyn qoryǵynyń aýmaǵynda ornalasqan jáne qoqıqazdar men basqa da qustardyń meken etý ortasy.
Sý resýrstary jáne ırrıgatsııa mınıstrligi jyl saıyn Qazaqstannyń barlyq aýmaǵynda tabıǵatty qorǵaý maqsatyndaǵy sý jiberý jumystaryn júrgizedi. Sý nysandaryn saqtaý jáne jergilikti ekojúıelerdi qoldaý úshin mıllıardtaǵan tekshe metr sý baǵyttalady. Tabıǵatty qorǵaý maqsatyndaǵy sý jiberý jumystary kezinde «Qazsýshar» RMK mamandary gıdrotoraptar men sý qoımalarynda táýlik boıy kezekshilik uıymdastyrady, sýdyń ótýine turaqty monıtorıng júrgizip, baqylaýdy qamtamasyz etedi.
Eske sala keteıik, sý nysandarynyń sarqylýynyń aldyn alý maqsatynda byltyr qabyldanǵan Sý kodeksine alǵash ret «ekologııalyq aǵyn» uǵymy engizildi. Bul — ózender, kólder men teńizderdiń ekojúıelerin saqtaý úshin qajet sýdyń eń tómengi ruqsat etilgen deńgeıi. Qujatta shaǵyn ózender men kólderdi qorǵaýǵa qoıylatyn talaptar da keńeıtildi.
Sonymen qatar sýly-batpaqty alqaptar men muzdyqtardy qorǵaýdyń erekshe rejımi kózdelgen.
— Sý nysandaryn sarqylý men lastanýdan qorǵaý — sharýalardy sýarmaly sýmen qamtamasyz etýmen qatar, jumysymyzdyń mańyzdy baǵyttarynyń biri. Mınıstrlik ekologııaǵa zııan keltirmeı, aýyl sharýashylyǵy alqaptaryna sýdyń turaqty berilýin qamtamasyz etý úshin úlken kúsh jumsaýda. Sý únemdeý tehnologııalary men zamanaýı sý esepteý quraldaryn engizý ekonomıka men qorshaǵan ortanyń qajettilikteri arasyndaǵy teńgerimdi saqtaı otyryp, sýdy tıimdi bólýge múmkindik beredi, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin qoqıqazdyń qaýyrsyny nege qyzǵylt bolatynyn jazǵanbyz.
