Qoqıqazdar Kaspıı teńizinde naýryzǵa deıin turaqtaıdy

AQTAÝ. QazAqparat - Qoqıqazdyń soltústiktegi turaqtaıtyn eń sońǵy núktesi - Qazaqstan. Kaspıı teńizi mańyndaǵy Qarakólge ushyp kelgen bir top qoqıqaz naýryzǵa deıin osynda qonaqtaıdy, dep habarlaıdy QazAqparat tilshisi.

Sýy jyly ári taıyz bolǵandyqtan qoqıqazdan bólek, qaz, úırek, aqqý da kóktem-kúzde osynda ushyp keledi. Jyldyń ár maýsymynda 60-qa deıin qanattylar kelse, onyń 20-dan astamy Qazaqstannyń Qyzyl kitabyna engizilgen.

Mańǵystaý sımvoldarynyń biri sanalatyn qoqıqazdyń álem boıynsha 8 túri taraǵan. Sonyń 2 túri Qazaqstanda meken etedi. Sońǵy sanaq boıynsha, elimizde 15-18 myńdaı qoqıqaz uıa salady eken. Antarktıdadan basqa barlyq qurlyqta mekendeıdi. Ásirese, ózen saǵalarynda, sýy tuzdy, qyshqyl kólderde turaqtaıdy.

Oblystyq orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Turǵanbaı Shapaǵatovtyń aıtýynsha, Qarakólde naýryzǵa deıin turaqtap, demalady. Biraq jumyrtqalamaıdy.

«Qarakól - Qyzyl kitapqa engizilgen qanattylar turaqtaıtyn meken. Sondyqtan da bul aýmaq tabıǵat qorǵaý ınspektorlarynyń jiti baqylaýynda. Qoryqtyń aýmaǵyna kiredi. Qoqıqazdar Qarakólden basqa Túpqaraǵan aýdany tóńiregindegi Sartas, Qarajanbas jeri men Túlen araldarynda bolady. Ómir súrýge qaısysy qolaıly bolsa, soǵan aýysyp otyrady. Kórip otyrǵanyńyzdaı, aqpan aıynan bastap keldi. Kóktemge deıin osynda bolady. Olar munda jumyrtqalamaıdy. Tek ýaqytsha demalady. Qarakól kólinde jyl saıyn kórýge bolady»,-deıdi orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Turǵanbaı Shapaǵatov.

Qoqıqazdar osy jerde tynyǵyp, demalyp bolǵannan keıin Mańǵystaýdan da ystyq Túrikmenstan, Iran jaqqa qaraı nemese Qorǵaljynǵa ushyp ketedi. Qarakólde bıyl qysta eki myń aqqý, tórt myńǵa jýyq úırek tektes qustar meken etken.

Eske sala keteıik, biz buǵan deıin Kaspıı teńizine bir top qoqıqaz ushyp kelgenin habarlaǵan edik.