Kókaral tospasy taǵy 2 metrge bıiktetiledi

ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Májilistegi Úkimet saǵatynda Kókaral dambasyn taǵy 2 metrge bıiktetý josparlanyp otyrǵanyn málim etti.

Depýtat Murat Ábenov Araldyń sýyn molaıtý baǵytynda atqarylyp jatqan jumystardyń jaı-kúıin suraǵan. Mınıstr Araldyń bul jobanyń ekinshi kezeńi bastalǵanyn atap ótti.

- Biz qazir mynandaı sheshimge kelip otyrmyz. Amanótkel gıdrotoraby mindetti túrde salynady. Sebebi Aral mańyndaǵy júıelerge sý berý úshin ondaı nysan kerek. Ekinshiden, kollektorlyq sýdy Úlken Aralǵa jiberý úshin Qyzylorda kanalyn júrgizemiz. Úshinshiden, Kókaral dambasyn taǵy da 2 metrge kóteremiz. Osy jumystardyń nátıjesinde qosymsha 7 mlrd tekshe metr sý jınaýǵa múmkindik týady, - dedi ol.

Onyń sózinshe, qazir Kókaral tospasynyń arqasynda 27 mlrd tekshe metr sý jınaqtalyp otyr.

- Qazir 23,7 mlrd tekshe metr sý bar onda. Sońǵy eki jylda Aralǵa 4 mlrd tekshe metr sý jetkizdik. Sonda qazirgi sý jınaqtaý múmkindigi 27 mlrd tekshe metr. Endi oǵan taǵy 7 mlrd tekshe metr syıymdylyq qosylady da, 34 mlrd tekshe metrge jetedi. Keletin sýdyń kólemi kóbeıip jatsa, ári qaraı da jumys isteımiz. Dúnıejúzilik bankpen osy jóninde kelissózder júrgizdik. Jobalyq-smeta qujattaryn qaıta ázirlep jatyrmyz. Bıyl memlekettik saraptamadan ótse, Dúnıejúzilik bankpen qarajat bólý máselesin pysyqtaımyz, - dedi vedomstvo basshysy.

Aıta ketý kerek, Kaspıı máselesin sheshý aıasynda Qazaqstan Reseıge Edil sýyn birlesip retteý týraly usynys jasamaqshy.