Kókaral bógetin rekonstrýktsııalaý jyl sońyna deıin aıaqtalady – Sý mınıstrligi
ASTANA. KAZINFORM – «Kókaral bógetin saqtaý jáne Syrdarııa ózeniniń saǵalaryn qalpyna keltirý» jobasy aıaqtalýǵa jaqyn. Bul týraly QR Sý resýrstary jáne ırrıgatsııa mınıstrliginiń resmı ókili Móldir Ábdýalıeva aıtty.
— «Kókaral bógetin saqtaý jáne Syrdarııa ózeniniń saǵalaryn qalpyna keltirý» jobasy aıaqtalýǵa jaqyn. Mınıstrlik jyl sońyna deıin Soltústik Araldy Úlken Aral teńizinen bólip turǵan Kókaral bógetin rekonstrýktsııalaý jumysyn aıaqtaýdy josparlap otyr. Bul Soltústik Araldy saqtaýǵa, sýdyń tuzdylyǵyn odan ári azaıtýǵa jáne aımaqtaǵy ekologııalyq jaǵdaıdy jaqsartýǵa kómektesedi, - dedi ol OKQ alańynda.
Sondaı-aq resmı ókil mınıstrlik Dúnıejúzilik bankpen birge 39 jobany qamtıtyn «Soltústik Aral teńizin saqtaý» jobasynyń ekinshi kezeńin ázirlegenin aıtty.
— Bul jobanyń qandaı paıdasy bolady? Bul 2000 adamdy turaqty jumyspen qamtamasyz etýge, Qyzylorda oblysynyń aýyl sharýashylyǵy men balyq aýlaý kásibin damytýǵa, qosymsha jumys oryndaryn ashýǵa, óńirdegi ekonomıkalyq jáne áleýmettik jaǵdaıdy jaqsartýǵa múmkindik beredi, - dedi Móldir Ábdýalıeva.
Buǵan deıin ol Soltústik Aralǵa naýryzdyń sońyna deıin 1,6 mlrd tekshe metr sý jiberiletinin aıtty.
Aıta keteıik, Soltústik Araldy saqtaý jobasynyń alǵashqy kezeńiniń nátıjesinde teńizdegi sý 42%-ǵa ulǵaıdy.