«Kókaral» bógetin qalpyna keltirýge arnalǵan 13 myń tonna shoıtas jetkizilmegen

QYZYLORDA. KAZINFORM — Qyzylorda oblysynda jyl basynan beri memlekettik satyp alý zańnamasynyń buzylý faktileri boıynsha 7 qadaǵalaý aktisi engizildi. Bul týraly oblystyq prokýratýranyń baspasóz qyzmeti habarlady.

— Barlyǵy 44 adam, onyń ishinde 22 basshy ákimshilik jaýaptylyqqa, 2 laýazymdy adam tártiptik teris qylyq jasaǵany úshin jaýaptylyqqa tartyldy. Quny 16,7 mlrd teńge bolatyn 9 memlekettik satyp alý konkýrsynyń kúshi joıyldy. Negizsiz shyǵynǵa jol bermeý baǵytynda quny 3,4 mlrd teńge bıýdjet qarjysy únemdeldi.
— «Qazsýshar» kásipornynyń Qyzylorda fılıaly qyzmetinde tekseris júrgizildi. Nátıjesinde «Kókaral» bógetin qalpyna keltirý jáne saqtaý jobasy úshin satyp alynǵan shoıtastyń 13 myń tonnasy jetkizilmegeni anyqtaldy. Onyń quny 188 mln teńge boldy. Fılıaldyń laýazymdy tulǵalaryna qatysty qylmystyq kodekstiń 189-baby 4-bóliginiń 2-tarmaǵymen qylmystyq is tirkelip, isti arnaıy prokýrorlar tergep-tekserdi, — delingen habarlamada.

Qazirgi kezde atalǵan vedomstvo qylmystyq is materıaldarymen tanysyp jatyr.

Oblystyq prokýratýra buǵan deıin probatsııa esebindegi 80 adamǵa elektrondy baqylaý quraldary qoldanylyp, 8-i jaza óteý talaptaryn buzýyna baılanysty túzeý mekemelerine qaıta oralǵanyn habarlaǵan bolatyn.