Kokaın tasymaldaǵan soǵys ardageri 3 jylǵa sottaldy
ASTANA. QazAqparat - AQSh soty Ekinshi dúnıejúzilik soǵystyń ardageri Leo Sharpty kokaındy zańsyz tasymaldaǵany úshin 3 jylǵa bas bostandyǵynan aıyrdy. Bul týraly Assoshıeıted Press agenttigi habarlady.
Detroıttyń federaldyq sýdıasy Nensı Edmýnds Sharpqa qatysty úkimdi ardagerdiń 90 jasqa tolǵan kúninde shyǵarǵan. Edmýndstyń aıtýynsha, Sharptyń jasy men soǵysqa qatysqandyǵy onyń úkimin jeńildetýge esh septigin tıgize almaǵan. Sýdıa ardagerdiń isin «óte qıyn ári jıirkenishti» dep ataǵan.
Agenttiktiń habarlaýynsha, jeti aı buryn Sharp meksıkalyq esirtki korteline arnalǵan 1 tonnadan astam kokaındy Mıchıganǵa asyryp jibergenin moıyndaǵan. 2011 jyly ony alǵash ret kóligimen esirtki tasyp bara jatqan jerinen ustaǵan bolatyn.
Reıter agenttiginiń habarlaýynsha, Sharp sot kezinde «qaıǵydan qan jutyp» otyrǵanyn aıtqan. Ol óziniń úsh jyldyq jazasyn ólim jazasymen birdeı dep ataǵan.
