«Koka-kolamen aýyratyn» jan em taba almaı dal
ASTANA. 12 qańtar. QazAqparat - Kópshiligimiz koka-kolany dámi men hosh ıisine bola súıip ishetinimiz ras. Al keıbir adamdar ony turaqty túrde tutynyp, nátıjesinde osy sýsynǵa táýeldi bolyp qalyp jatady. Solardyń biri D. Djons atty Anglııanyń turǵyny.
Ol kúnine 1-den 3 lıtrge deıin kola sýsynyn ishpese kóńili jáı bolmaıtyn kórinedi. Al dárigerler bolsa osydan birneshe jyl buryn bul jigittiń atalǵan sýsynnan fızıkalyq jáne psıhologııalyq jaǵynan da táýeldi ekendigin anyqtap, dıagnoz qoıǵan. Djons bir aıda ishetin koka-kola sýsyny úshin 400 dollarǵa shyǵyndalady. Alǵash ret ol sýsyndy jasóspirim kezinde iship kórip, keıin onyń mólsherin kún sanap kóbeıte bergen. Endi ol úsh lıtrli bótelkeni taýysa salysymen, oǵan birden «taǵy da bir bótelke ishsem» degen oı kele beredi eken. Kóp jyldar boıy sýsyndy turaqty túrde jáne kóp mólsherde qoldaný Djonstyń artyq salmaq jınaýymen jáne qant dıabetine shaldyǵýymen aıaqtaldy. Ol buryn júrgizýshi bolyp jumys jasaǵan eken. Alaıda kompanııa oǵan boıyndaǵy anyqtalǵan aýrýyna baılanysty kólik júrgizýge tyıym salyp, nátıjesinde ol jumysynan da aıyrylǵan. Al dárigerler bolsa ony baıaǵyda-aq jeke baqylaýlaryna alǵanymen, patsıentke qalaı em-dom jasaý kerektigin bilmeı álek bolyp otyr. Sebebi medıtsına men narkologııada áli kúnge deıin «koka-kolamen aýyratyn» adamdardy emdeý amaldary oılap tabylmaǵan, dep jazady massaget.kz.
