Koka-kola men Pepsı-kola ózgeredi
ASTANA. 12 naýryz. QazAqparat - Eýronıýs habarlaǵandaı, Coca-Cola Co men PepciCo ózderiniń retsepterin ózgertetin kórinedi. Óıtkeni olar óz ónimderiniń syrtyna kantserogenderdiń (qaterli isiktiń paıda bolýyna áser etetin zattekter) bar ekendigi týraly jazbaý úshin osyndaı sheshimge kelgen eken.
Kalıfornııa shtatynyń jańa zańy boıynsha, atalmysh 2 ónimniń quramyndaǵy karameldi boıaǵyshtarda kezdesetin 4-metılımılazol kantserogenderge jatqyzyldy. Sondyqtan kompanııa basshylary karamel óndirýshilerden 4-metılımıdazoldyń mólsherin barynsha azaıtý úshin ony daıyndaý tehnologııasyn ózgertýdi ótingen.
Tutynýshylar quqyǵyn qorǵaý boıynsha zertteý ortalyǵynyń dırektory Maıkl Djekobsonnyń pikirinshe, bul qadam da jetkiliksiz.
«Sýsyndardyń quramynda qalyp otyrǵan 4-metılımıdazol báribir amerıkandyq normalardan edáýir joǵary. Bul boıaǵyshty naryqtan múldem alyp tastaý kerek!» - dep qysqa qaıyrdy ol.
Koka-kola men pepsı-koladaǵy 4-metılımıdazoldy eń aldymen Ǵylymı jetistikterdi qoǵam ıgiligi úshin paıdalaný ortalyǵy tapqan. Al kompanııa qojaıyndary sýsyndarynyń retseptisin ózgertse de, onda adam densaýlyǵyna keri áser etetindeı ýly zattardyń joqtyǵyn aıtyp, bet baqtyrmaýda. Degenmen, keıbir ǵalymdar da olardyń sózin sóıleıdi.
«Atalmysh zattekti adamnyń osy sýsyndar arqyly qabyldaý dozasynyń azdyǵy sonsha, tipti olardan bolatyn qaterli isik aýrýynyń paıda bolýy týraly sóz qozǵaýdyń ózi artyq», - dep aǵynan jarylady toksıkolog Jan-Fransýa Narbonn.
AQSh naryǵyndaǵy gazdalǵan sýsyndardyń 90%-ǵa jýyǵy Coca-Cola Co men PepciCo enshisinde. Kompanııa ókilderi retseptiniń ózgerýi sýsyndardyń dámine esh áser etpeıtindigin aıtýda.
