Kók Jaılaýda zardap shekken qyz evakýatsııalandy
ALMATY. QazAqparat - Almaty qutqarýshylary Kók Jaılaý shatqalynda zardap shekken qyzdy evakýatsııalady, dep habarlaıdy QazAqparat tilshisi.
«1 naýryz kúni Almatynyń qutqarý qyzmetine Kók Jaılaý shatqalynan qońyraý shalyndy. Belgili bolǵandaı, bes adamnan (úsh qyz jáne eki jigit) turatyn top kúndiz taýǵa shyqqan. Serýen kezinde qyzdardyń bireýi (22 jasta) qulap, tabanyn aýyrtyp alady. Ol ózdiginen júre almaı qalǵan. Qutqarýshylar atalǵan topty ózderi kórsetken geolokatsııa boıynsha tez tapty», - dep atap ótti qutqarý qyzmetindegiler.
Zardap shekken qyzǵa oqıǵa ornynda alǵashqy medıtsınalyq kómek kórsetildi. Sodan keıin ony qutqarý quraldarynyń kómegimen shatqaldan túsirip, jedel járdem brıgadasyna jetkizdi. Jedel járdem zardap shekken qyzdy qalalyq aýrýhanaǵa apardy.
Qutqarý qyzmetinen 1 tehnıka, 5 qutqarýshy men 1 júrgizýshi jumyldyryldy.
Avtory: Danııar Daýtalıev
