«Kók túriktiń kók semseri» atanǵan Kúltegin Qutlyqulynyń týǵanyna 1330 jyl toldy
7 jasynda ákesi Qutlyq qaǵan qaıtys bolyp, jetim qalǵan ol 10 jasynda erligimen kózge túsken. Keıin aǵasy Bilge qaǵanmen birge 716 jyly ákesiniń inisi Bógúni taqtan taıdyryp, aǵasyn ІІ Shyǵys Túrik qaǵanatynyń qaǵany etip, ózi bas qolbasshy bolady. Batyrlyǵy men alǵyrlyǵy áıgili bolyp, «kók túriktiń kók semseri» atanǵan ol 731 jyly 27 aqpanda 47 jasynda kóz jumady. Bilge qaǵan inisiniń basyna qoıylǵan eskertkishtegi tasqa oıyp jazdyrǵan ǵumyrnamasynda: «ákem qaǵan ólgende inim Kúltegin jeti jasta qaldy. On jasta Umaı tekti sheshemniń baǵyna inim Kúltegin er atandy» dep onyń erlik jolyn túgel baıandaǵan.
Bul ejelgi túrki jazba eskertkishi Mońǵolııadaǵy Orhon ózeni boıyndaǵy Erdenı Tszý monastyrynyń janyna ornatylǵan. Bıiktigi 3,15 metr, eni 1,34 metr bolatyn eskertkishtegi jazýdy álemge áıgili etken dat ǵalymy V. Tomsen boldy.
