Kók tiregen kúmbezdi qoıma - Ulttyq arhıv
Arhıv ata-babalarymyzdyń tarıhyn ǵana emes, olardyń arman-tilegin, aqyl-oıyn, danalyǵy men daralyǵyn, parasaty men úlgi ónege-ósıetterin saqtap otyratyn kıeli oryn. Osy oraıda Ulttyq arhıv halyqtyń qujattyq jadyn bir taldap jınap, óskeleń urpaq úshin saqtaıdy.
Elbasy Nursultan Nazarbaevtyń qoldaýymen 2002 jyly 12 jeltoqsandaǵy № 01- 8.15 tarıhı hattamalyq sheshimimen Ulttyq arhıv ǵımaraty 2003 jyly Astana qalasynda salynatyn memlekettik nysandar tizbesine engizildi. 2006 jyldyń 14 jeltoqsanynda saltanatty túrde ashyldy.
Bul qazirgi zaman talabyna saı kórkem de ásem ǵımarat. Onyń toǵyz qabatty, kók tiregen kúmbezdi qoımasy shyǵystyq stıldegi sheksizdik pen turaqtylyqty beıneleıdi. Al ákimshilik bóliginiń eýropalyq stıldegi kelbeti Esil ózeniniń sol jaǵalaýyndaǵy jańa ákimshilik ortalyǵyn tolyqtyryp turǵandaı.Jalpy aýmaǵy 12725, 8 sharshy metrdi quraıdy, sonyń ishinde arhıv qoımalary - 3260, 06 sharshy metr.
Ulttyq arhıv dırektorynyń orynbasary Tursyngúl Qusaıynovanyń sózine qaraǵanda, búginde bul nysan qoǵamnyń materıaldyq jáne rýhanı ómirin beıneleıtin, Qazaqstan halqy murasynyń ajyramas bóligi bolyp tabylatyn - tarıhı, ǵylymı, áleýmettik, ekonomıkalyq, saıası, mádenı mańyzy bar arhıvtik qujattar qoryna aınaldy.
Onyń basty maqsaty - rýhanı jáne bilimdi ortany damytý, eldiń mádenı murasyn zertteý, saqtaý, qalpyna keltirý jáne tıimdi paıdalaný.
«Basty maqsatty oryndaýda Ulttyq arhıv qoryn qujattarmen tolyqtyryp, saqtalýyn qamtamasyz etý jáne qujattardyń memlekettik esebin júrgizý atqarylyp keledi. QR Ulttyq arhıvi qyzmetindegi eń birinshi baǵdary - ártúrli jetkizgishterde bastapqy kapıtalynda memlekettik menshik úlesi bar ortalyq memlekettik organdar men uıymdardan, ulttyq kompanııalar men aktsıonerlik qoǵamdardan qujattardy irikteý jáne saqtaýǵa qabyldaý bolyp tabylady», - dedi Tursyngúl Qusaıynova.
«Astana bas jospary» ǵylymı-zertteý jobalaý ınstıtýtynyń málimetine qaraǵanda, atalǵan nysannyń eń úzdik nobaı-ıdeıasyna respýblıkalyq baıqaý ótkizilgen. Otandyq sáýletshi Nurmuhan Toqaevtyń sáýlettik ıdeıasy boıynsha Túrik fırmasynyń ókilderi jumys jobasyn ázirlep, QR Ulttyq muraǵatynyń ǵımaratyn turǵyzǵan. Ǵımarat halyqaralyq standarttar men talaptarǵa saı keletin joǵary tehnologııalyq muraǵattyq jabdyqpen qamtamasyz etildi. Sheksizdik pen turaqtylyqtyń sımvoly bolyp tabylatyn kúmbez tárizdes qoımanyń shyǵys naqyshtaǵy stıli men ákimshilik korpýstyń eýropalyq stıli úlesken zamanaýı ǵımarat.
Atap aıtqanda, 2007 jyldan búgingi kúnge deıin Ulttyq arhıv qoryna 337506 myńnan astam saqtaý birlikteri qabyldandy.
Qazaqstan Respýblıkasynyń Ulttyq arhıvi «Mádenı mura» memlekettik baǵdarlamasyn iske asyrý barysynda memlekettik saqtaýǵa jaqyn jáne alys shetel memleketterinen Qazaqstan tarıhyna qatysty túpnusqa retinde sanalatyn qujattar kóshirmeleri alyndy. Olardyń arasynda Reseı, Armenııa, Ózbekstan, Polsha, Mysyr, AQSh, Túrkııa, Qytaı, Vengrııa, Frantsııa, Ispanııa bar.
Azamattardyń zańdy quqyǵyn qamtamasyz etý maqsatynda sońǵy jyldary respýblıkanyń azamattaryna, sonyń ishinde shetel azamattaryna muraǵattyq qujattar negizinde áleýmettik-quqyqtyq sıpatta muraǵattyq anyqtamalar berý boıynsha memlekettik qyzmet kórsetilip keledi. Qujattardyń máńgi saqtalýy men paıdalanýyn qamtamasyz ete otyryp, Qazaqstan Respýblıkasynyń Ulttyq arhıvi azamattyq qoǵamnyń nyǵaıýyna, qazaqstandyqtardy azamattyq, otanshyldyq, toleranttyq rýhta tárbıeleýge septigin tıgizedi.
