Kók taǵylarynyń kórkem saıysy: Úzdik búrkitshiler anyqtaldy
ASTANA. QazAqparat - Astana mańynda ótip jatqan ataqty búrkitshi Kúntýǵan Toqtybaıuly atyndaǵy búrkitshilerdiń halyqaralyq týrnıri óz máresine jetti, dep habarlaıdy QazAqparat tilshisi.
Elimizdiń 10 oblysynan kelgen 30 búrkitshi qatysqan saıys Astana irgesindegi Qoıandy aýylynda keshe bastalǵan bolatyn. Búgin aqtyq synda saıatshylar búrkitti qoıan men túlkige saldy. Sonymen qatar qarshyǵa men ıtelgini qolǵa shaqyrý men kepterge salý jáne dalbaıǵa oınatýdan baq synasty. Sonyń ishinen úsh qus túri (búrkit, qarshyǵa, ıtelgi) boıynsha jeńimpazdar anyqtaldy.
Bıyl tórtinshi márte tý kótergen Kúntýǵan Toqtybaıuly atyndaǵy halyqaralyq týrnırdiń jeńimpazy Jambyl oblysynan kelgen búrkitshi Baqdáýlet Babajan atandy.
«Eki kúnge sozylǵan saıys bes kezeńnen turdy onyń úsheýi alǵashqy kúni ótti, búgin fınal boldy. 30 búrkitshiniń ishinen 10-y fınalǵa joldama alyp, sonyń ishinen úzdikter anyqtaldy. Jalpy jarysqa kelsek, men ózim 10 jylǵa jýyq búrkit salý ónerine tóreshilik etip, baǵalap kelemin. Bizge qaraǵanda Qazaqstanda búrkit salýdyń erekshe aıtyp ótetin tusy bar, Mońǵolııada búrkit óneri negizinen taýly aımaqta júrgiziledi, al Qazaqstanda jazyqta salynady, osy tusta taýdyń búrkiti jazyq dalada abdyrap qalady tıisinshe jazyqta ósken búrkit biz jaqqa barǵanda taýly aımaqty jatsynatyny bar. Degenmen bul kedergi emes jáne osyndaı erekshelikterge qaramastan, eki el búrkitshileri ózara tyǵyz baılanysta dep aıta alar edim. Óıtkeni, bizde bolatyn búrkitshiler saıysyna qazaqstandyqtar qalmaı qatysady, tıisinshe bizde Qazaqstan uıymdastyrǵan sharalardan qalmaýǵa tyrysamyz. Tek qana jarysqa qatysyp qoımaı biz búrkitshilermen bilgenderimizben bólisip, ózara tájirıbe almasamyz», - dedi Mońǵolııadan kelgen halyqaralyq deńgeıdegi tóreshi Ádilbek Qabyluly.
Kúntýǵan Toqtybaıuly atyndaǵy búrkitshilerdiń halyqaralyq týrnıriniń jeńimpazdary: Búrkit salý boıynsha І oryndy Jambyl oblysynan kelgen Baqdáýlet Babajan oljalady, ІІ oryndy almatylyq Aqberen Qurmanǵalıev qanjyǵasyna baılasa, úshinshi júldeni Almaty oblysynyń búrkitshisi Almas Seıitjan ıelendi. Al qarshyǵa salý boıynsha І oryndy Almaty oblysynyń qatysýshysy Aıan Seıitjan ıemdendi, ІІ oryndy aqmolalyq Qazybaı Ápsalam enshiledi jáne úshinshi júldeni jambyldyq Berikbolsyn Jalǵasuly qorjynyna saldy. Itelgi salýda І oryndy Mańǵystaý oblysynan kelgen Aıshýaq Taımanov utyp alsa, ІІ oryndy elordalyq Rýslan Maǵzumov jeńip aldy, tıisinshe ІІІ oryndy Atyraý oblysynyń ókili Arman Qoshqarov oljalady.
Eske sala ketsek, básekeniń júlde qory jarty mıllıon teńgeni quraıdy.
