Kók shaı ómirdi uzartady - zertteý

NUR-SULTAN. QazAqparat - Ǵalymdar jańa zertteý nátıjesinde aptasyna úsh ret kók shaı ishý júrek-qantamyr aýrýlarynan bolatyn ólim qaýpin tómendetip, uzaq ómir súrýge áser etedi degen toqtamǵa keldi, dep jazady QazAqparat CNN resýrsyna silteme jasap.

Qytaı ǵalymdarynyń aıtýynsha, qara shaıdan góri kók shaıdyń densaýlyqqa paıdasy mol. Zertteýge 100 902 adam qatysqan jáne olar jeti jyl boıy baqylaýda bolǵan. Zertteý nátıjesinde kók shaı ishetinderde júrek aýrýy men ınsýlt qaýpi 20 paıyzǵa tómen bolǵan.

Qytaıdyń júrek-qantamyr aýrýlary ulttyq ortalyǵynyń, Beıjiń medıtsına kolledjiniń, Qytaı medıtsına ǵylymynyń akademııasy birlesip júrgizgen zertteýde 50-den asqan shaı ishpeıtin adamdar shaı ishetinderge qaraǵanda 1,6 jasqa az ómir súretini anyqtalǵan.

Ǵalymdardyń aıtýynsha, kók shaı júrek-qantamyr aýrýlarynan qorǵaıdy. Al qara shaı kók shaı sııaqty óńdelmeıtindikten, onyń tıimdiligi tómen.