Kók shaı men kofe júrek aýrýynan saqtaıdy
ASTANA. 17 naýryz. QazAqparat - Kók shaı men kofeni jıi ishken adamda ınfarkt, ınsýlt jáne ózge de júrek-qan tamyrlary aýrýlaryna shaldyǵý qaýpi tómen bolady. Mundaı ǵylymı jańalyqty japondyq ǵalymdar ashyp otyr. Japonııanyń eki birdeı medıtsınalyq ortalyǵy júrgizgen zertteý 13 jylǵa sozylyp, oǵan 45-74 jas aralyǵyndaǵy 82 myń adam qatysqan.
BAQ.KZ saıtynyń jazýynsha, zertteýdi júrgizgen Tokıo ulttyq onkologııalyq ortalyǵy men Osakadaǵy sal jáne júrek-qan tamyrlary aýrýlaryn zertteý ortalyǵynyń mamandary. Osy ýaqyt aralyǵynda qatysýshylardyń 3,5 myńǵa jýyǵy aýyr júrek aýrýlaryna shaldyǵyp, mılaryna qan quıylypty.
Alaıda, kúnine bir pıala kók shaı ishken adamdarda aýyrý qaýpi ózgelerge qaraǵanda 22-35 paıyzǵa tómen bolǵan. Al, aptasyna 3-6 pıala kók shaı ishetinderde bul kórsetkish 11-20 paıyzǵa tómen.
Japon ǵalymdarynyń pikirinshe, kók shaı qan tamyrlarynyń qalypty deńgeıde saqtalýyna yqpal etse, kofe qan quramyndaǵy qantty tómendetedi.
