«Kók kıttiń» qarmaýynan saqtaýdy surap 9 ata-ana aryzdandy - OQO prokýratýrasy
Bul týraly óńir prokýrorlary qalalyq bilim bólimi basshylary men ata-analar bas qosqan jınalysta málimdedi, dep habarlaıdy QazAqparat HAA tilshisi.
Oblys prokýrory birinshi orynbasarynyń mindetin atqarýshy Halı Mamataevtyń sózinshe, sońǵy bir aptada 8 jasóspirim men kámelet jasyna tolǵan bir turǵynnyń týystary ishki ister organdaryna kómek surap, aryzdanǵan. Olar óz perzentterine tún jarymda belgisiz bireýler qońyraý shalyp, «Kók kıt» oıynyn oınaýǵa úgittegenin aıtqan.
«Belgili bolǵandaı, jasóspirimderdiń uıaly telefondaryna qońyraý shalyp, olardy qorqytyp, oıynǵa úgittegender qazaq tilinde habarlasqan. Olarǵa «oınamasań seniń ápkeńdi, aǵańdy ne bolmasa basqa da týysyńdy óltirip ketemiz» dep qorqytqan. Osyǵan oraı, oblystyq Іshki ister departamentiniń bilikti mamandarynan arnaıy top quryldy, habarlasqandardy izdestirý sharalary júrgizilýde. Sondaı-aq atalmysh 9 derek boıynsha QR Qylmystyq Kodeksiniń 105-baby 3-tarmaǵymen is qozǵalyp, tergeý amaldary júrgizilýde. Osy jerde taǵy bir eskerte keteıin, kúdikti tulǵalardyń kinálary dáleldense, olar 3 jyldan 7 jylǵa deıin bas bostandyqtarynan aıyrylady. Mundaı áreketterge jol bergender qatań jazalanady»,- dedi H.Mamataev.
Óz kezeginde qadaǵalaý organ ókilderi bas qosýǵa kelgen ata-analarǵa óz balalarynyń is-áreketterine baqylaý júrgizip, saqtyq sharalaryn qolǵa alýdy eskertti. Atap aıtqanda, jasóspirimder qolyndaǵy smartfondardy qarapaıym baılanys quralyna aýystyrýǵa keńes berildi.
Al, sala mamandary bergen málimetterge sáıkes, jyl basynan beri óńirde jasóspirimder arasynda óz-ózine qol salý boıynsha 3 jaǵdaı oryn alǵan. Ázirge bul jaǵdaılar «Kók kıtpen» baılanystyrylyp otyrǵan joq.
Jıyn barysynda ustazdar qaýymy mektepterde uıaly telefondardy qoldaný boıynsha tártip kúsheıtiletinin, balalarǵa smartfondar paıdalanýǵa ruqsat berilmeıtinin atap ótti. Búginde barlyq mektepterde áleýmettik jelilerdegi sýıtsıdtik toptarǵa qatysty saqtyq sharalary qolǵa alynyp, jasóspirimderge túsindirý jumystary júrgizilýde.
Jıyn sońynda barlyq mektepterdegi ata-analar komıteti tóraǵalary balalardyń úıde jáne mektepte smartfon ustap júrýine tyıym salý jóninde úndeý qabyldady.