«Kók qaǵazdyń kúni ozyp barady...» - baspasózge sholý
***
«Egemen Qazaqstan» gazetinde «Qos boksshynyń qýanyshy» atty maqala berilgen. Jaqynda Qazaqstan ulttyq qurama komandasynyń kapıtany Danııar Eleýsinovke «Sport» atalymy boıynsha «Daryn» memlekettik jastar syılyǵy tapsyryldy. Bul Eleýsinovke ǵana emes, jalpy barlyq bylǵary qolǵap sheberlerimizdiń eńbegin eskerip, solarǵa da berilgen ataq deýge bolady.
Byltyr jyl sońynda Sporttyq jekpe-jekter jáne kúsh qoldanylatyn sport túrleri konfederatsııasy portaly www.confederation.kz otandyq BAQ jáne mamandar arasynda 2014 jylǵy úzdik boksshyny anyqtaý maqsatynda saýalnama júrgizgen bolatyn. Sonyń nátıjesinde elimizdegi talantty jastarymyzdyń biri Jánibek Álimhanuly «Jyldyń úzdik boksshysy» atandy.
Jánibek 2013 jyly álem jáne Azııa chempıony bolsa, byltyr HVІІ Jazǵy Azııa oıyndaryn jeńip aldy. Almaty oblysynyń Jylandy aýylynyń týmasy 21 jastaǵy Jánibek Álimhanuly Koreıanyń Inchhon qalasynda ótken synda ózin barlyq qyrynan kórsetip, boks mamandarynan joǵary baǵa alyp qaıtty. Sóıtip, ol Azıada aldynda Almatyda ótken Qazaqstan chempıonatynda birinshi oryndy jeńip alǵany kezdeısoq emes ekenin dáleldedi.
Bas basylymda «Jeńis» jalaýy jelbiredi» degen maqala basyldy. Tabaldyryqtan attaǵan Jańa jyl - mereıli, merekeli datalarǵa tuspa-tus kelýimen, aıtýly oqıǵalar aıasynda aıshyqtalýymen erekshe bolmaq. Sonyń ishinde TMD elderinde «Ardager jyly» dep jarııalanyp, Uly Otan soǵysyndaǵy Jeńiske 70 jyl tolýy atalyp ótýi aǵa urpaqtyń óshpes erligin tý etken, jas býynǵa ónege tutqan elimiz ómirindegi jarqyn beleske aınalǵaly tur. Elbasy N.Á. Nazarbaevtyń bastamashylyǵymen maıdan ardagerlerin qurmetteý jáne qoldaýǵa arnalǵan jalpyulttyq aktsııa bul kúnderi odan ári jalǵasyn tabýda. Osy maqsattaǵy sharalardyń biri 30 jeltoqsanda Astanada bastaý alǵan «Jeńiske qurmet» respýblıkalyq marafony bolyp otyr. Keshe oǵan qatysýshylar «Jeńis» jalaýyn Qaraǵandyǵa jetkizdi. Qaladaǵy «Máńgilik alaý» eskertkish keshenine gúl shoqtary qoıyldy. Jalaýdy «Astana» óńirlik qolbasshylyǵy áskerleriniń qolbasshysy, general-maıor Sultan Kamaletdınov qabyldap aldy.
***
«Aıqyn» gazetiniń jazýynsha, ótken jyldyń sońy men jańa jyldyń basynda sarapshylar arasynda eń kóp talqylanyp jatqan máselelerdiń biri - álemdik valıýta jaǵdaıy. Óıtkeni qytaı ıýani 2014 jyly eń belsendi saýdalanyp jatqan 10 valıýtanyń biri boldy. Osyǵan oraı, qorlardy álemdik basqarýdaǵy qytaı valıýtasynyń róli kópshilik kútkennen góri anaǵurlym jedel ótedi degen pikir qalyptasýda. Sarapshylar muny qazirdiń ózinde bul baǵytta jasalǵan basty bes qadammen túsindiredi.Osy jaıynda tolyq bilgińiz kelse, «Kók qaǵazdyń kúni ozyp barady...» degen maqalany oqyp shyǵyńyz.
Osy basylymda «Shoýdan da sharshadyq-aý» degen maqala berilgen. Jańa jylda jatyp alyp teledıdar kórdik.
«Dúnıeniń sharýasyn tyndyryp tastaǵandaı, tórdiń aldynda kósilip jatýymyz jaman-dy. Sonda baıqaǵanymyz ne boldy? Qazaqstan televızııasy qazir ekiudaı kúıde tur eken. Jolaıryqta tur. Budan burynyraqta, 20 jyl shamasy buryn dál osyndaı jaǵdaıda emes-ti. Ol kezde maqsat aıqyn, jol dańǵyl bolatyn. Ne búlindi deısiz be? Qazir bizdiń televızııa anasyna da, jaryna da jaltaqtap turǵan bosbelbeý erkekke uqsaıdy. Anasynyń sózin sóıleıin dese, áıeliniń qabaǵy túıýli. Áıeline jaqtasaıyn dese, anasyn qımaıdy.
ıAǵnı taza qazaqy dúnıe jasaǵysy keledi, biraq taza orystildi aýdıtorııanyń talabynan da shyǵa almaıdy. Sondyqtan da orta deńgeıli, arbany da syndyrmaıtyn, ógizdi de óltirmeıtin dúnıeler fabrıkasyna aınalýǵa májbúr. Onyń ústine, óniminiń jartysynan astamyn aýtsorsıngke berip, ózi efırlik stýdııaǵa ǵana aınalyp bara jatqan kebi jáne bar. Zaman talaby, órkenıetti elderdiń teledástúri degen sııaqty uzyn-shubaq syltaýlar tizimin keltirýge bolar, biraq memleket quraýshy ulttyń múddesin belinen syzyp tastaý týraly zań áli shyqqan joq. Shyqpaıdy da»,-dep jazady maqala avtory.
***
«Ana tili» gazetiniń sońǵy sanynda «Júrgenov jaıly fılm túsirildi» atty materıal jarııalandy. T.Júrgenov atyndaǵy Qazaq ulttyq óner akademııasynda asa kórnekti qoǵam jáne memleket qaıratkeri Temirbek Júrgenov jaıly «Temir narkom Temirbek» atty derekti fılmniń tusaýkeseri bolyp ótti. Shara Temirbek Júrgenov eskertkishine gúl shoqtaryn qoıýdan bastaý aldy.
Fılmniń tusaýkeseri aldynda Qazaqstannyń Halyq artısi Asanáli Áshimov sóz alyp, bul týyndynyń búgingi urpaq úshin mán-mańyzyna toqtaldy. Sonymen birge belgili jazýshy Sofy Smataev ta Temirbek Júrgenovtiń eren eńbegin el umytpaıtynyn aıtty.
Týyndyda T.Júrgenovtiń balalyq shaǵynan bastap, onyń qoǵamdyq jumystarǵa belsene aralasqany, halqy úshin aıanbaı ter tókkeni kezeń-kezeńimen sıpattalady. Rejısseri Erkin Raqyshev osy ýaqytqa deıin beımálim bolyp kelgen birneshe materıalǵa súıene otyryp, Qazaq KSR aǵartý isi mınıstriniń ómiri jaıly tereńirek ashýdy maqsat tutqanyn tilge tıek etti.
