«Kók bazar» mańyndaǵy úıler aýlasyn jaryqtandyrý máselesi osy aıda sheshiledi

ALMATY. QazAqparat – Almaty ákimi Erbolat Dosaevtyń Medeý aýdany turǵyndarymen kezdesýinde qala turǵyny úı aýlasyn jaryqtandyrý máselesine qatysty shaǵymyn jetkizdi, dep habarlaıdy QazAqparat tilshisi.

«Bizdiń «Kók bazar» aýdanyndaǵy turǵyn úılerdiń aýlalaryn jaryqtandyrý boıynsha kúrdeli másele bar. Jaryqty jıi sóndiredi. Tıisti mekemelerge habarlasa almaımyz. Elektr jaryǵyn, tipti aptalap bermeýi múmkin», - dedi qala turǵyny.

Almaty ákimi Erbolat Dosaev qalanyń jaryqtandyrý máselesine qatysty túsinik berdi.

«Ótken jyly sot protsesterinen keıin biz «Almaty Qala Jaryq» mekemesin qalaǵa qaramaǵyna qaıtardyq. Qazirgi ýaqytta qaladaǵy barlyq jaryq núkteleri soǵan tıesili. Degenmen, jaryqtandyrý jabdyqtaryna «IBM 2007» kompanııasy qyzmet kórsetedi. Ol shamdardy aýystyrý men basqa da jumystardy júrgizýi tıis. Qazirgi tańda «Almaty Qala Jaryq» osy merdigerlik uıymmen birge jumys isteý shemasyn ázirledi. Siz aıtqan máseleni sheshý úshin aýdan ákimine naýryz aıynyń sońyna deıin ýaqyt beremin. Ol máseleni baqylaýǵa alady», - dedi Erbolat Dosaev.

Sonymen qatar, Medeý aýdanynyń ákimi Erkebulan Orazalın «Kók bazar» mańynda ornalasqan úılerdiń mańaıyn abattandyrý jáne «Sergek» beınebaqylaý kameralaryn ornatý jumystary josparda bar ekenin málimdedi.