Kohlearlyq ımplanty bar balalar onlaın ońaltý kýrsynan óte bastady
ASTANA. KAZINFORM — Kohlearlyq ımplanty bar balalardy ońaltý júıesi turaqty onlaın sabaqtarmen tolyqtyryldy, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
QR Eńbek jáne halyqty áleýmettik qorǵaý mınıstrligi Áleýmettik qorǵaý salasyn damytýdyń ulttyq ǵylymı ortalyǵy kohlearlyq ımplanty bar balalarǵa arnalǵan qashyqtan estý jáne sóıleý qabiletin ońaltý baǵdarlamasyn uıymdastyrdy. Onlaın sabaqtar dástúrli formattaǵy ońaltý kýrstaryn tolyqtyryp, balalardyń turǵylyqty jerine qaramastan mamandarmen turaqty baılanysta bolýyna múmkindik beredi.
Alǵashqy qashyqtan oqytý kýrsy 2026 jylǵy 1 qazan men 1 qarasha aralyǵynda ótti. Oǵan elimizdiń toǵyz óńirinen 3 pen 7 jas aralyǵyndaǵy 16 bala qatysty. Olardyń 12-si aýyldyq jerde turady.
Kohlearlyq ımplant ornatylǵannan keıin balanyń dybystardy ajyratý, sóıleýdi túsiný jáne sóıleý daǵdylaryn qalyptastyrý qabiletin damytý úshin júıeli túrde sabaq ótkizý qajet. Alaıda shalǵaı eldi mekenderde turatyn otbasylardyń sýrdopedagog, logoped jáne basqa da beıindi mamandardyń kómegine turaqty júginý múmkindigi shekteýli.
— Qazir Ortalyq fılıaldary elimizdiń segiz óńirinde jumys isteıdi. Jyl saıyn olarda 234 balaǵa arnalǵan ońaltýdyń 936 kýrsy ótkiziledi. Al fılıaldary joq aýdandardan kelgen taǵy 150 bala Ortalyqta táýlik boıy ońaltýdan óte alady.Dástúrli formattaǵy ońaltý kýrstarynyń arasynda birneshe aı úzilis bolýy múmkin. Osy kezeńde balalarǵa kórsetiletin kómekti tolyqqandy qamtamasyz etý maqsatynda Ortalyq bıylǵy jyldyń 1 qazanynan bastap estý jáne sóıleý qabiletin úzdiksiz ońaltý baǵdarlamasyn júzege asyrýda. Ol mamandardyń balamen tikeleı jumys isteýin, qashyqtan ótkiziletin sabaqtardy jáne ata-analardyń qatysýymen úı jaǵdaıynda oryndalatyn jattyǵýlardy qamtıdy, — dep túsindirdi vedomstvo mamandary.
Ár bala úshin jasyna, damý deńgeıi men jeke erekshelikterine qaraı ońaltýdyń jeke marshrýty ázirlenedi. Balanyń qajettiligine baılanysty sabaqtardy sýrdopedagog, logoped, defektolog nemese psıholog ótkizedi. Mamandarmen onlaın kezdesýler aptasyna eki ret, ıaǵnı aıyna segiz ret uıymdastyrylady.
Ortalyqtyń segiz pedagogi alǵashqy kýrsta 128 onlaın sabaq ótkizdi. Sabaqtar qolaıly bolý úshin ata-analardyń jumys kestesi men balalardyń kún tártibi eskerile otyryp, eki aýysym boıynsha uıymdastyryldy.
Baǵdarlamanyń mańyzdy bóligi — ata-analardyń belsendi qatysýy. Mamandar olarǵa tıisti túsindirý jumystaryn júrgizip, úıde oryndaýǵa tapsyrmalar berdi. Osy baǵytta otbasylarǵa 80 beınesabaq qoljetimdi.
Sonymen qatar ata-analar jattyǵýlardyń oryndalý barysy men nátıjelerin tirkep, málimetterdi mamandarǵa joldaıdy. Bul balanyń damýyndaǵy ózgeristerdi baqylaýǵa, týyndaǵan qıyndyqtardy talqylaýǵa jáne aldaǵy sabaqtardy josparlaýǵa múmkindik beredi.
Baǵdarlama aıasynda balanyń damý dınamıkasy ár úsh aı saıyn baǵalanady. Nátıjesinde mamandar qajet bolǵan jaǵdaıda ońaltýdyń jeke marshrýty men otbasyǵa beriletin usynymdardy túzetedi.
Qashyqtan oqytý formaty dástúrli ońaltý kýrstary arasyndaǵy kezeńde balalarǵa kórsetiletin qoldaýdyń aıasyn keńeıtedi. Nátıjesinde otbasylar mamandardyń turaqty kómegine qol jetkizip, ońaltý jumystary ár balanyń jeke qajettilikterine saı jalǵasyn tabady.
Osyǵan deıin Qazaqstanda kohlearlyq ımplanty bar balalardy jyl boıy ońaltýdyń jańa modeli engiziletini aıtyldy.
