Kógershinderimniń eń qymbaty 80 myń teńge turady — qusshy
QYZYLORDA. KAZINFORM — Qazaly aýdany Áıteke bı kentiniń turǵyny Dosan Narmanqulov jeti jasynan bastap kógershin asyraýmen aınalysyp keledi. Kazinform tilshisimen suhbatta ol qus baptaýdyń qyr-syry, qyzyǵy týraly aıtyp berdi.
Kóp halyq kógershindi beıbitshiliktiń belgisi, jer betine tynyshtyq pen bereke ákeletin qus dep esepteıdi.
— Kógershin — kepterdiń qolǵa úıretilgen túri. Basynda kekili, aıaǵynda uzyndyǵy 20-25 santımetrge jetetin balaǵy bolady. Mundaıdy jabaıy kepterden kórmeısiz. Kógershinniń súıkimdiligi óz aldyna, aspanda ushyp oınaıdy, 15-20 ret salto aınalyp bıleıdi. Osyndaı kóz tartarlyq áreketine qarap otyryp mıyń tynyǵady, sharshaǵanyń basylady, — dedi keıipkerimiz.
Kógershinniń baǵasy onyń súıkimdiligine, ushýyna jáne oınaýyna baılanysty qubylatyn kórinedi. Beıbitshilik qusy sándik úshin ósiriletin bolǵasyn ony torda ustaıdy.
— Qoregi — bıdaı, júgeri, arpa sııaqty dánder. Tazalyqty jaqsy kóretindikten dándi jýyp, keptirip beremiz, ol shań bolmaýy kerek. Kógershinderdiń ishinde sýyqqa óte tózimdileri bar. Olar 40 gradýs aıazda shatyrda qalsa da úsip ketpeıdi. Sýyqqa tózbeıtin túrleri bar, olardy tek jyly uıada ustaısyń. Qustarǵa mezgilimen dárýmen beresiń. Kógershinniń óte erekshe tuqymy bar, qaýyrsyny qara, sary, aq, kók, qyzyl, qońyr, kókshil sııaqty jeti túrli túske boıalǵan, — dedi Dosan Narmanqulov.
Onyń qamqorlyǵynda qazir úsh uıada 200-ge jýyq qus bar. Bir mezette eń árisi 300-ge deıin jetkizgen kezi bolǵan.
Eń alǵashqy kógershindi bala kúninde 5 myń teńgege satyp alǵan. Adamnyń senimdi serigine aınalǵan asyrandy qustardyń ishindegi eń qymbaty búginde 80 myń teńgege deıin saýdalanady.
— Kógershinder de adam sııaqty jup quryp ómir súredi. Birin-biri qorǵaıdy. Jylyna tórt ret jumyrtqalaıdy. 18 kún boıy jumyrtqany birese erkegi, birese urǵashysy kezekpen basyp shygarady. 21 kún boıy balapandy ekeýi birge tamaqtandyrady. Al úsh aptadan keıin ol qanatyn qomdap kókke samǵaıdy, — dedi keıipkerimiz.
Elimizdiń túkpir-túkpirinde Dosan sekildi beıbitshilik qusyn baptaǵan azamattar az emes.
Jýyrda ǵana Qazaly aýdanynyń ortalyǵynda kógershinder jármeńkesi uıymdastyrylyp, olar óz qustaryn jurtshylyq nazaryna usyndy.
Sırek kezdesetin qustardyń tuqymyn selektsııalandyrý týraly aıtyp, tájirıbe bólisti.
Keıipkerimiz respýblıkanyń ǵana emes, kórshi memleketterdiń qusshylarymen de tyǵyz qarym-qatynasta ekenin atap ótti.
Al jýyrda reseılik kompanııa mıyna ornatylǵan neırochıp arqyly ushýyn basqarýǵa bolatyn kógershinderdi tanystyrǵan edi.