«Kógergen úıde tońyp otyrmyz»: Qyzylordadaǵy apatty úı turǵyndary dabyl qaqty
QYZYLORDA. KAZINFORM – Qyzylorda qalasyndaǵy apatty úı turǵyndary kóp jyldan beri úreı qushaǵynda kún keship kele jatqanyn aıtyp dabyl qaqty.
Olardyń aıtýynsha, úı qysta qatty sýyq.
- Bala-shaǵamyz sýyqtan aýyryp qalady. Alda taǵy qys kele jatyr, oǵan qalaı shydaıtynymyzdy bilmeımiz. Al jazda úıdiń ishi qatty ystyq bolyp, terlep, dem jetpeı, aýa bolmaı qatty qınalamyz. Úı kógerip, ıistenip ketken, sol kógergen ıisten aýyryp júrmiz. Úıge sý ketip, osyndaı jaǵdaıda ómir súrip jatqanymyzǵa birneshe jyl boldy, - dep shaǵymdandy turǵyndar Instagram áleýmettik jelisinde.
Olar aımaq basshylyǵynan qulaý qaýpi tónip turǵan baspananyń súrilip, ornyna jańasy berilýin suraıdy.
- Máselemizdi nazardan tys qaldyrmaýyńyzdy, oń sheshim qabyldaýyńyzdy shyn júrekten ótinemiz, - delingen ótinishte.
Turǵyndardyń janaıqaıyna qala ákimdigi jaýap berdi.
- Qyzylorda qalasy Tasbóget kenti Tasaryq kóshesindegi №4 (1980 jyly salynǵan, 24 páterli, 2 qabatty) turǵyn úı «TechPower Build» JShS-niń 05.06.2023 jylǵy №37 saraptama qorytyndysy boıynsha apatty dep tanylǵan turǵyn úılerdiń tizimine engizilgen. 2023 jyldan bastap atalǵan apatty turǵyn úıdiń páter ıeleri jalǵyz turǵynjaıy Qazaqstan Respýblıkasynyń zańnamasynda belgilengen tártippen avarııalyq dep tanylǵan Qazaqstan Respýblıkasynyń azamattary tobyna turǵyn úı alý kezegine tirkelgen. Páter ıelerine jańa páter turǵyn úı kezek rettiligimen beriledi, - delingen habarlamada.
Eske salaıyq, Qyzylorda oblysynda saraptama qorytyndysymen apatty dep tanylǵan 69 kóppáterli turǵyn úı bar.
