Qoǵajapanov isi: burynǵy vıtse-mınıstr sotta jaýap berýden bas tartty
ASTANA. KAZINFORM — Elordanyń qylmystyq soty burynǵy Mádenıet jáne sport vıtse-mınıstri Erlan Qojaǵapanovqa qatysty laýazymdyq ókiletin asyra paıdalandy degen aıyppen isti qarap jatyr. Búgingi sot otyrysynda eks-sheneýnik iske qatysty túsinik berýdi jalǵastyrýdan bas tartty.
Erlan Qojaǵapanov tergeýdiń barysy men protsestiń ashyqtyǵyna qatysty oıyn ortaǵa saldy.
— Bizde mundaı suraýlardy joldaýǵa quqyqtyq negiz ǵana emes, tipti ony qalaı, kimge, kim arqyly jiberý kerektigi týraly forma da joq. Qazir meni tergeý protsesi aýada ilinip tur. Men aıtqym keletin jaıt óte kóp. Qurmetti sýdıa, men óte mańyzdy dúnıe aıtqym keledi, bul protseske BAQ ókilderiniń qatysý bastamasyn biz kótergen joqpyz, bizge qajet bolmaǵan. Agenttik tóraǵasynyń orynbasary Senatta turyp, bul ashyq protsess bolady dep búkil elge jarııa etti. Sonyń nátıjesinde gazette, teledıdarda, ınternette jappaı materıaldar shyǵyp jatyr. Protsesten úzindiler jarııalanyp jatyr. Men bálkim, bul protsestiń basynda bári syrtqa shyǵyp ketpese eken dep te oılaǵan shyǵarmyn. Biraq, nege syrtqa shyqty? Elimizdegi negizgi quqyq qorǵaý organdarynyń, tergeý organynyń kásipqoılyqqa jatpaıtyn áreketi. Taǵy da qaıtalap aıtamyn, tergeý tobynyń basshysy óz basshylyǵyn da, qadaǵalaýshy organdy da jańylystyrdy, — deıdi ol.
Osylaısha, burynǵy vıtse-mınıstr sotta sóıleýdi jalǵastyrýdan bas tartty.
— Qosymsha nemese qaıtalama saraptama taǵaıyndaý týraly qujat qaıda beriledi nemese jiberiletinine qatysty sizder ruqsat bermegen taǵy bir qujat bar. Men mán-jaıdy uqpaıynsha, tolyq jaýap bere almaımyn. Qazirgi jaǵdaı múlde tolyq emes, — deıdi ol.
Sondaı-aq sotta sarapshyny tartý týraly qaýlyny oryndaý múmkin emestigi aıtyldy. Jańa mán-jaıǵa baılanysty sot otyrysy erteńge qaldy. Sonymen qatar, sýdıa atalǵan qylmystyq is boıynsha tergeý jumystary osy aptada aıaqtalatynyn habarlady.
Buǵan deıin burynǵy vıtse-mınıstr Erlan Qojaǵapanovtyń advokaty qylmystyq isti toqtatýdy suraǵan edi.
Aıta keteıik, buǵan deıin ótken sot otyrysynda sot eks-sheneýnik ákelgen shyǵyndy esepteý úshin sarapshy tartý týraly sheshim shyǵarǵan edi.
Eske salsaq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady. Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.
Bıyl naýryzdyń sońynda Antıkor atalǵan is boıynsha tergeý amaldary aıaqtalǵanyn habarlady.