Qoǵamnyń tynyshyn ketiretin qańqý sóz taratqandar 12 jylǵa bas bostandyǵynan aıyrylýy múmkin

ASTANA. QazAqparat - Qoǵamdyq tártip pen qaýipsizdikke selkeý túsiretin qańqý sóz taratqandar 12 jylǵa bas bostandyǵynan aıyrylýy múmkin. Bul týraly búgin Májilistiń Zańnama jáne sot-quqyqtyq reforma komıtetinde QR Qylmystyq kodeksi jobasyn talqylaý barysynda málim boldy.

QR Bas prokýrorynyń orynbasary Iogan Merkeldiń aıtýynsha, kodeks jobasynda jurt arasynda jalǵan, qańqý sóz taralyp, onyń saldary qoǵamdyq tártip pen qaýipsizdiktiń buzylýyna soqtyrǵan jaǵdaıda 12 jylǵa bas bostandyǵynan aıyratyn bap qarastyrylyp otyr. Bul rette prokýratýra ókili atalmysh normanyń tek banktik júıeniń jumysy boıynsha jalǵan aqparattarǵa qatysty bolyp qoımaıtynyn da atap ótti. «Máselen, byltyrlary Tarazda bóget buzylǵany týraly daqpyrt taralyp, turǵyndar túnniń ortasynda páterlerin tastaı qashqan», - deıdi I. Merkel.

Bul rette Bas prokýrordyń orynbasary aǵymdaǵy jyldyń aqpan aıynda jurt arasynda birqatar bankterdiń bankrottyǵy týraly qańqý sózdiń taralǵanyn, sonyń saldarynan bankter aıtarlyqtaı japa shekkenin eske saldy.