Qoǵamnyń qarsylyǵyna qaramastan kókpar tartqan batyr qyz jaıly derekti fılm jaryq kórdi

Dástúrli qasań qoǵamda áıelderge kókpar tartýǵa qatań tyıym salynǵan.

Biraq Eva qıyndyqqa moıymastan tabandylyq tanytyp, taptaýryndardy buzdy, áleýmettik jáne mádenı tosqaýyldardy eńsere bildi.

Ol «kókpar - tek erlerdiń oıyny» degen myqtylarmen teketireste boldy.

Degenmen Evany qoldaıtyndar da tabylyp, onyń jigerine, armanyna adal minezine laıyqty baǵasyn bere aldy.

Olar Evany jigerlendirip, tosqaýyldarǵa tótep berýine kómegin aıamady. Eva kádimgi qara kúshten de, ıkemnen de kende emes, al onyń ishki jigeri, jalyny men tabandylyǵy kórgen adamdy qanattandyrady.

Fılm kórermendi emotsııalyq saıahatqa úıirip áketip, keıipkerdiń aldyndaǵy qıyndyqtardy, onyń sáıgúlikke degen mahabbatyn pash etedi.

«Ata-anam kókparǵa qatysýǵa tyıym salǵan. Biraq bir jerde kókpar bolyp jatyr dese delebem qozyp, úıden qashyp ketetinmin. Kókparǵa alǵash ret 15 jasymda qatystym. Shaqyrýsyz barǵan edim. Ózim de tań qaldym. Atta otyryp, erlerdiń kókparda jan alyp, jan berisip jatqanyn kórdim. Olarǵa qosyla ketip, serkeni tartyp alyppyn. Erler meni qýa jóneldi, biraq ustatpaı kettim. Qazir jurttyń kókparǵa qyzyǵýy artqanyn kórip júrmin. Maǵan uldar da, qyzdar da hat jazyp, úıretshi dep jatady», - deıdi Eva Jıgalına.

«Eva. Batyr qyz» derekti dramasy - Temirbek Amanjoldyń rejısserlik alǵashqy qadamy.

Temirbektiń ózi de at týrızmin jáne atqa otyrý mádenıetin zerttep júr. Evanyń hıkaıasy - salt-dástúr, jiger men qurbandyq shıelenisken álemge shytyrman saıahat.

Osyndaı qym-qýyt álemde názik jan aǵysqa qarsy júzip, mahabbat pen jalynnyń almaıtyn qamaly joǵyn aıshyqtaıdy deıdi ol.

«12 jyldan beri attardy fılmge túsirip, atqa otyrý mádenıetin, neonomadızmdi zerttep júrmin. «Eva. Batyr qyz» fılminde qazaqylyqtyń formýlasyn pash etkim keldi. Eli bóten, dini bóten basqa jurttar nelikten osy oıynǵa ǵashyq bolyp, bar ómirin sarp etýge daıyn? Kókpar men at nesimen tartady? Eńbekti osy suraqtarǵa jaýap izdeıtin zertteý deseńiz de bolady», - deıdi Temirbek Amanjol.

Fılmniń prodıýseri Dýman Qojahmettiń aıtýynsha, osy fılmniń halyqaralyq deńgeıge shyǵýǵa áleýeti mol.

Qazir birneshe sheteldik strımıng-servıstermen prokat týraly kelissóz júrip jatyr deıdi ol.

Derekti fılm QR Mádenıet jáne sport mınıstrliginiń tapsyrysymen Ulttyq kınony qoldaý memlekettik ortalyǵynyń qoldaýymen túsirildi.