Qoǵamnyń saıası mádenıeti jáne belsendiligi artyp keledi — Prezıdent

ASTANA. KAZINFORM — Qoǵamnyń saıası mádenıeti jáne belsendiligi artyp keledi. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Osyǵan deıin Konstıtýtsııalyq komıssııanyń on otyrysy ótti. Komıssııa músheleri túzetýlerdiń asa kóptigin eskere otyryp, ortaq paıymǵa keldi. «Ata Zańǵa jekelegen ózgeris engizý jetkiliksiz, qazirgi jaǵdaıda jańa Konstıtýtsııa qabyldaǵan jón» degen baılam jasady. Soǵan sáıkes qańtar aıynda jańa Konstıtýtsııanyń alǵashqy nusqasy jarııalandy. Bul bastama qoǵamnyń aıryqsha nazaryn aýdardy. Men muny óte jaqsy úrdis dep sanaımyn, — dedi Prezıdent.

Memleket basshysy azamattarymyz Konstıtýtsııa jobasynyń túrli baptaryn qyzý talqylap jatqanyn atap ótti.

— Qoǵamnyń saıası mádenıeti jáne belsendiligi artyp keledi. Bul — meniń saıası baǵdarymda kórsetilgen negizgi mindetterdiń biri. Elimiz úshin «Ártúrli kózqaras — birtutas ult» jáne «plıýralızmge — ashyqpyz, ekstremızmnen — qashyqpyz» qaǵıdattary óte mańyzdy. Sol arqyly qoǵamdyq dıalogtiń damýyna, elimizdiń úzdiksiz alǵa basýyna jol ashylady. Qazirdiń ózinde bir nárseni kúmánsiz aıtýǵa bolady: jurtshylyq nazaryna múlde jańa qujat usynylyp otyr. Bul qujat memleketimiz damýdyń dańǵyl jolyna túskenin, ıaǵnı sapalyq turǵydan jańa deńgeıge kóterilgenin kórsetedi, — dedi Qasym-Jomart Toqaev.

Osydan buryn Prezıdent Konstıtýtsııalyq komıssııa quramynda shetel mamandary joq ekenin aıtty.