Qoǵamǵa iritki salatyn árbir áreketke tosqaýyl qoıamyz – Prezıdent

ASTANA. KAZINFORM – Bárimiz kez kelgen aqparatqa syn kózben qarap, tek resmı málimetterge súıenýimiz qajet. Bul týraly Memleket basshysy Qasym-Jomart Toqaev «Birlik. Jasampazdyq. Órleý» taqyrybymen ótip jatqan Qazaqstan halqy Assambleıasynyń kezekti HHHІІІ sessııasynda aıtty.

«Qazirgi kúrdeli kezeńde eldiń birligi men yntymaǵyn saqtaý – eń basty mindet. Biz qoǵamǵa iritki salatyn árbir áreketke tosqaýyl qoıamyz. Men buryn da aıtqanmyn, qazaqtyń memlekettigine qarsy keıbir teris pıǵyldy adamdar qarap otyrmaıdy. «Atyń shyqpasa, jer órte» degen. Olar qoǵam ishine iritki salý úshin áleýmettik jelide túrli qıturqy áreketterge baratyny anyq. Bir sózben aıtsaq, halyq arasynda jalǵan málimet taratady. Sondyqtan bárimiz kez kelgen aqparatqa syn kózben qarap, tek resmı málimetterge súıenýimiz qajet. Jurtymyz el taǵdyry synǵa túsken sátte qaısarlyq tanytyp, yntymaǵyn saqtaı bilgen. Janashyrlyq, tileýlestik sııaqty adamı qasıetterdi bárinen bıik qoıǵan. Biz tarıhtyń taǵy bir synaǵynan ótip jatyrmyz. Birneshe apta boıy halqymyzdyń birligi men tabandylyǵy jáne teńdessiz tabıǵat apatyn abyroımen eńserý qabileti synǵa túsýde», - dedi Prezıdent.

Memleket basshysynyń paıymynsha, kez kelgen daǵdarys biz úshin synaq qana emes. Ol árqaısymyzdyń boıymyzda buǵyp jatqan kúsh-qýatymyz ben qarym-qabiletimizdi ashyp, tyń múmkindikter beredi.

«Elimizdiń órkendeýine kedergi keltiretin nárseniń bári, erte me, kesh pe, tarıh qoınaýyna enip, kelmeske ketedi. Endeshe, qazirgi tabıǵat apaty baıbalamǵa salyp, ómirden túńiletindeı nárse emes. Ósip-órkendeý jolynda túrli kedergi kezdesedi. Biraq onyń artynan jaqsylyq keledi. Bul alapat tasqyn biz úshin jalǵan jetistikke aldanyp, «zaıa ketken kezeńnen» ajyraıtyn jolaıryq bolýǵa tıis», - dedi Qasym-Jomart Toqaev.