Qoǵamǵa paıdaly jobalar jasaǵym keledi – IT maman Saıat Toqsanbaevpen suhbat
Saıat Toqsanbaev Taraz qalasynda týǵan, 17 jasynda otbasymen Astanaǵa kóship kelgen. 2014 jyly Sáken Seıfýllın atyndaǵy Qazaq agrotehnıkalyq ýnıversıtetine grantqa tústi. Sol jyly qarasha aıynda ýnıversıtet stýdentteri arasyndaǵy baıqaýda «Toqsanbaev antıvırýsy» startap jobasy «Gran-prı» jeńip alǵan. Osydan keıin Saıat birden Máskeý tehnologııalyq ınstıtýtyna «Web-qosymshalar jasaýshy» mamandyǵy boıynsha oqýǵa shaqyryldy jáne 2017 jyly ol «Kross-platformalyq ınternet-dúken» (e-commerce) jobasy boıynsha dıplomdyq jumysyn tabysty qorǵaǵan.
«Men baǵdarlamalaý men vırýsologııany 16 jasymda zertteı bastadym. Ol kezde «Konıka» fotosalonynda anama kómektesip júrgenmin. Keıin dızaınerdiń kómekshisi, dızaıner bolyp jumys istedim, birneshe jyldan keıin bas dızaıner boldym. Adobe qosymshalarynda – Photoshop, Premier pro, After effects jáne basqalarymen jumys isteýdi úırendim, meniń oıymsha, bul tájirıbe maǵan Prezıdent Іs basqarmasy júıesinde mansabymdy bastaýǵa kómektesti. Kolledjdegi oqýymdy sátti aıaqtaǵan soń, Sáken Seıfýllın atyndaǵy Qazaq agrotehnıkalyq ýnıversıtetine grantqa tústim. Eki aıdan keıin ýnıversıtettegi startaptar baıqaýynda jeńimpaz atanyp, Máskeý tehnologııalyq ınstıtýtyna shaqyrtý aldym. Ondaǵy dıplomdyq jobam – «e-commerce platformasy: saıt + mobıldi qosymsha» daıyn ónim retinde qorǵaldy», - dedi Saıat Toqsanbaev.
2017 jyldyń naýryz aıynda Saıat QR Prezıdenti Іs basqarmasynyń materıaldyq-tehnıkalyq qamtamasyz etý basqarmasyna óndiristik praktıkadan ótýge jáne jumysqa ornalasýǵa shaqyrtý aldy.
Foto: akorda.kz«Onda birneshe aı boıy prezentatsııany durys ótkizýdi, iskerlik qarym-qatynasty jáne basqa da mańyzdy jumys daǵdylaryn úırendim. Osynda jumys istegen 5 jyl ishinde dızaınerden ázirleýshige deıingi joldan óttim. 500-den astam prezentatsııa jasadym, QR Parlamenti Senatynyń veb-saıtyn, Senat pen Májilistiń mobıldi qosymshasyn, sondaı-aq ishki aqparattyq júıelerdi qaıta jobalaýǵa qatystym. IT salasynda jumys isteýge adamdardyń ıgiligine jaraıtyn ónimderdi jasaý týraly úlken armanym túrtki boldy. Meniń tálimgerim Asqar Qusaıynov maǵan prezentatsııalardy qalaı durys usyný kerektigin úıretip, beınerolıkter ázirleýge kómektesti. Tájirıbeden ótý nátıjesinde meni jaqsy maman retinde atap, jumysqa qabyldady», - dep eske aldy Saıat Toqsanbaev.
Saıat Toqsanbaev jasaǵan mańyzdy jáne jarqyn IT ónimderdiń biri – Şýche-Býrabaı kýrorttyq aımaǵyn tsıfrlandyrý. Saıat bul ıdeıanyń Býrabaıǵa saparynda paıda bolǵanyn aıtty.
«Múgedektigi bar azamattar, sonyń ishinde egde jastaǵy adamdar bıiktegi tamashalaý aımaǵyna shyǵa almaıtyny meni qynjyltatyn. Olarǵa kómektesýdiń jolyn tabamyn dep úmittendim. 2021 jyldyń jeltoqsanynda Prezıdent qolynan «Şýche-Býrabaı kýrorttyq aımaǵyn tsıfrlandyrý» startap jobasyn júzege asyrý úshin grant aldym. Býrabaı aýmaǵyndaǵy týrıstik joldardy tsıfrlandyrý úshin 2 aı qajet boldy, 140 shaqyrymnan astam joldy júrip óttim. Tsıfrlandyrý kezinde ormanda birneshe ret adasyp, jartastan da quladym. Tań atar tusta orman ishinde júrý qanshalyqty qaýipti ekenin túsinbegen de edim. Biraq armanym oryndalady-aý degen oı meni alǵa jeteledi», - dep bólisti Saıat.
Onyń jobasyn Facebook-tiń 600-den astam qoldanýshysy, onyń ishinde «Qazaqtýrızm» ulttyq kompanııasy qoldaǵan. Joba www.vr-tour.kz saıty arqyly barlyǵyna qoljetimdi. Ony kez kelgen qurylǵydan, sonyń ishinde vırtýaldy orta kózildiriginen kórý múmkindigi bar.
Sonymen birge, Saıat Toqsanbaev IT salasyn tańdaıtyn jastarǵa keńes berdi jáne birinshi kezekte ózin-ózi damytýmen aınalysyp, jańa tehnologııalardy úırený keregin aıtty.
«Ekinshiden, ár adamnyń 10 jyldan kim bolam degen maqsattary bolýy kerek. Negizgi tarmaqtardy bólip kórsetip, olarǵa kezeń-kezeńimen jetý qajet», - deıdi S. Toqsanbaev.
Suhbat sońynda Saıat Toqsanbaev bolashaq jospary jaıly aıtyp berdi.
«Birinshiden, otbasyn qurǵym keledi. Ekinshiden, «PІB vedomstvolyq baǵynysty uıymdarynyń qyzmetkerleri úshin mansaptyq damý» startap-jobasyn bastaǵym keledi. Meniń oıymsha, bul bolashaq qyzmetkerlerdi qalyptastyrýdaǵy jalpy kózqarasty ózgertýge kómektesetin mańyzdy joba. Bul júıe basqa mamandyqty tez ıgerýge, aldyńǵy basshynyń tájirıbesin qoldanýǵa, sondaı-aq korporatıvtik mádenıetti damytýǵa kómektesedi. Úshinshiden, «QR kórikti jerlerin tsıfrlandyrý» startapyn damytýdy jalǵastyrǵym keledi. Elimizdiń damýyna jáne QR PІB júıesiniń damýyna óz úlesimdi qosamyn dep úmittenemin», - deıdi Saıat Toqsanbaev.
