Qoǵamǵa dintanýshylardyń kómegi asa qajet - Qaırat Lama Sharıf
ALMATY. 16 qazan. QazAqparat - Qoǵamǵa dintanýshylardyń kómegi aýadaı qajet. Ol úshin, aldymen, elimizdegi ımamdardyń sapasyn arttyrý kerek. Dinı saýattylyqty kóterý ózekti másele. Dintanýshylar oblystarǵa baryp jumys isteýi tıis.
Keshe, 15 qazanda ál-Farabı atyndaǵy Qazaq ulttyq ýnıversıtetine oqytýshy-professorlar qaýymymen jáne stýdenttermen arnaıy kezdesýge kelgen Qazaqstan Respýblıkasy Din isteri agenttiginiń tóraǵasy Qaırat Lama Sharıf osyndaı ózekti máselelerdi kóterdi. Ol bul salada nátıjege jetý úshin dintanýshylarmen qatar, ár azamattyń da jan-jaqty belsendilik tanytýyn alǵa tartty.
Joǵary oqý ornynyń stýdentterimen jáne oqytýshylarymen kezdesýde Din isteri agenttiginiń tóraǵasy, aldymen, Elbasy joldaýynyń júzege asyrylýy jaıynda keńinen áńgimeledi. Atqarylyp jatqan naqty isterge toqtaldy. Sodan keıin kórermender tarapynan qoıylǵan suraqtarǵa tyńǵylyqty jaýap qaıtardy. Qaırat Qaıyrbekulynyń aıtýynsha, ımam - sheshen, tarıhtan saýatty, ulttyq salt-dástúrden bileri mol adam bolýy kerek. «Eshqandaı din ekstremızmdi shaqyrmaıdy. Dinı ekstremızm shartty uǵym. Hıdjab - musylmannyń kıimi degen uǵym joq. Ony ózimiz oılap taptyq. Qazaq qyzyn erkin ustaǵan. Shashyn órip, qos burymyn jibergen. Abaı da arýlarymyzdyń burymyn, sulýlyǵyn jyrǵa qosqan. Názik jandarymyzdy jyrlamaǵan aqyn joq. Oramaldy jańa túsken kelinge enesi taqqan. Oramal - tazalyqtyń, qalyńdyqtyń belgisi. Al saqal qoıý - qazaqta 63 jasqa jetkende júzege asqan. «Aq saqal» degen uǵym qazaqqa ǵana tán. Saqal - musylmandyqtyń belgisi emes. Tisi túskende atalarymyz aýyzdaǵy urtyn jaýyp tursyn dep saqaldy qoısa, ájelerimiz jaýlyq taqqan», - degen pikirin de bólisti. Saqal men hıdjab, qysqa balaq paryz emestigin aıtyp, «ımandy bolýy úshin, birinshiden, patrıot bolý kerek, ultyńdy, ádet-ǵurpyńdy súıýiń kerek», - deıdi Q. Lama Sharıf. Sonymen birge endi kóshelerde dinı kitaptardy taratýǵa ruqsat joqtyǵyn, mundaı kitaptar tek meshitterde ǵana taratylatyndyǵyn jáne dinı saýatty jaqsartý úshin neni oqyp, neni bilý kerektigi, ruqsat etilgen oqýlyqtar tizimi barlyǵy Din isteri agenttigi tarapynan baqylaýda ekendigin eskertti. Bul maǵlumattar agenttiktiń saıtynda jarııalanyp turatyndyǵynan habardar etti.
QazUÝ rektory Ǵalym Mutanuly Qazaqstan Respýblıkasy Din isteri agenttiginiń tóraǵasy Qaırat Qaıyrbekulyna ǵıbratty, ózekti áńgimeleri úshin alǵysyn jetkizip, estelik syılyq tabystady.
