Qoǵamǵa, adamǵa qyzmet etý – boryshymyz – Konstıtýtsııa qurdasy

ORAL. KAZINFORM — Dúnıe esigin 1995 jyly ashyp, búginde túrli salada aldyńǵy lekte júrgen Konstıtýtsııa qurdastary az emes. Solardyń biri, BQO polıtsııa departamenti 2-sanatty avtokólik sharýashylyǵynyń polıtseı-júrgizýshisi, polıtsııa aǵa serjanty Salyq Hametovpen merekege oraı Kazinform tilshisi áńgimelesken edi.

- Salyq Maǵzomuly, meıram kúni de qyzmette, aýdanda júr ekensiń. Polıtsııa qyzmetkeri bolamyn dep bala jastan armandadyń ba?

- Iá, solaı. Báıterek aýdany Mahambet aýylynda týyp-óstim. Kishkentaı kezimnen polıtsııa qyzmetkeri bolsam deıtinmin. Sol armanyma qol jetkizip, Ata zańymyz aıasynda qoǵam tynyshtyǵy men adam ómirin saqtaýǵa úles qosyp júrgenime qýanyshtymyn. Ózim Qurmanǵazy atyndaǵy mýzyka kolledjin sýretshi mamandyǵy boıynsha támamdadym. Іshki ister organdarynda 2018 jyldan beri qyzmet etip kelemin. Óz isińe myǵym, sharýaǵa muqııat bolyp, kóligińe asa uqyptylyqpen qarasań, alynbaıtyn qamal joq dep oılaımyn. Óńirde bolyp jatatyn qylmystyq oqıǵalarǵa jol erejesin qatań saqtaı otyryp, jedel tergeý tobyn ýaqtyly jetkizý – meniń mindetim.

- Áriptesteriń seni óz qyzmetin minsiz atqarýmen birge jumystan tys ýaqytta qoǵamdyq birlestik arqyly keıingi jastardyń, stýdent, oqýshylardyń sportpen etene aınalysýyna eńbek sińirip júrgenińdi aıtady. Shynymen solaı ma?

- «Úlkenge – qurmet, kishige – izet», deıdi ǵoı halqymyz. Qoǵamdyq birlestik qurý ıdeıasy sonaý 2012 jyly oıyma kelgen. Sol jyly dosym Nurbek Nurhatulymen birge kishi býynǵa kómek qolyn sozý maqsatynda «Jas dem» qoǵamdyq birlestigin qurdym. Stýdent kezde-aq qalaǵa, aýdanǵa jastardy aparyp, túrli is-sharalardy ótkizetin edik. Kontsert qoıamyz, sporttyq jarystarda keıingi jastarǵa demeýshi bolamyz. Qazir «Jebe» dep atalatyn qoǵamdyq birlestigimizde jumys toqtap qalǵan joq. Eń bastysy, jas býyn ómirden óz oryndaryn tabýy úshin olardyń jolyn asha bilý kerek.

- Polıtsııa qyzmetkeri bolý úshin ne qajet dep oılaısyń?

- Polıtseı bolý úshin, menińshe, bilim de, bilik te, bilek te kerek. Ustamdy qalpyńnan aınymaı, azamattarmen til tabysa bilý jáne sypaıy bolý – basty shart. Ómirde neshe túrli adamdar kezdesedi, sonyń bárimen sóılese bilý ońaı emes. Sonymen qatar polıtsııa qyzmeti mansap pen baq qýǵandar úshin ǵajaıyp baspaldaq emes, ol ádildikti jaqtap, jemqorlyqqa qarsy tura bilýi tıis. Memleket bizge ózimiz qalaǵan bilim men mamandyqty alýǵa múmkindik berdi, endi halyqtyń qaýipsizdigin qamtamasyz etý, eldi qorǵaý – bizdiń mindetimiz. Biz ant bergen kezde soǵan sert etkenbiz. Sol joldan aınymaý – maqsatymyz.

- Maqsat demekshi, bolashaqtan ne kútesiń?

- Eń bastysy, eldiń tynyshtyǵy der edim. Qoǵamǵa, adamǵa qyzmet etý – basty boryshymyz. Adam ómirinen qymbat eshteńe joq. Bul týraly Ata zańymyzda jaqsy aıtylǵan. Endeshe, osy qaǵıdany oıdan esh shyǵarmaı, Qazaq eliniń damýyna úles qosa bilsek, odan asqan maqsat ta joq.

- Áńgimeńe rahmet! Qyzmetińe tabys tileımin.

Eske sala keteıik, budan buryn Qazaqstan Konstıtýtsııasy kúni qarsańynda Batys Qazaqstan úıleri sýǵa ketken taǵy 23 otbasynyń baspanaly bolǵanyn jazǵan edik.
Ǵaısaǵalı Seıtaq
https://kaz.inform.kz/news/batis-kazakstanda-uyler-suga-ketken-tagi-23-otbasi-baspanali-boldi-2d46f3/