Qoǵamdyń keńeste jıi kóteriletin ózekti 5 másele ataldy

ASTANA. QazAqparat - OKQ-da qoǵamdyq keńesterdiń alǵashqy respýblıkalyq májilisiniń nátıjesi talqylanǵan baspasóz máslıhatynda QR Din isteri jáne azamattyq qoǵam mınıstrligi Azamattyq qoǵam komıtetiniń tóraıymy Álııa Ǵalymova qoǵamdyq keńester jıi talqylaıtyn eń ózekti 5 máseleni atady, dep habarlaıdy «QazAqparat» HAA tilshisi.

«Eger qoǵamdyq keńester aınalysatyn eń ózekti máselelerdi atap ót deseńizder, úlken qalalar men aımaqtarda aıyrmashylyq baryn eskerý kerek. Dese de, bizdiń tájirıbemiz kórsetip otyrǵandaı, eń birinshiden qoǵamdyq keńes kóteretin eń ózekti máselelerdiń aldyńǵy qataryna qoǵamdyq kólik máselesin jatqyzýǵa bolady. Ekinshiden, páter ıeleri kooperatıvine qatysty máseleler óte ózekti. Úshinshiden, turǵyn-úı kommýnaldyq sharýashylyǵyna qatysty barlyq suraqtardy jatqyzýǵa bolady. Demek, sý tartý, sý qubyrlarynyń máselesi degendeı... Tórtinshiden, tarıfterge qatysty suraqtar jıi kóteriledi. Besinshiden, azyq-túlik baǵalary», - deıdi Álııa Ǵalymova.

Álııa Ǵalymova búgin ótken qoǵamdyq keńesterdiń І respýblıkalyq májilisiniń negizgi mindeti - qoǵamdyq keńesterdiń qyzmetin jetildirý boıynsha oń tájirıbe men usynystardy ortaǵa salý,  pikir almasý ekenin aıtady. Spıker qoǵamdyq keńesterdiń, birinshi kezekte, turǵyndar men memlekettik organdar arasyndaǵy baılanysty uıymdastyrý úshin qurylǵandyǵyn atap ótti. Eki jyl jumystyń ishinde qoǵamdyq keńester osy mindetti iske asyrýdaǵy tıimdiligin dáleldegen.

Eske sala ketsek, búgin Din isteri jáne azamattyq qoǵam mınıstrliginiń uıymdastyrýymen Qoǵamdyq keńesterdiń І respýblıkalyq májilisi ótken bolatyn. Basqosýǵa 500-den astam delegat qatysty. Onyń ishinde Parlament depýtattary, respýblıkalyq jáne óńirlik qoǵamdyq keńesterdiń tóraǵalary, ortalyq memlekettik organdardyń, Ázerbaıjan, Qyrǵyzstan, Tájikstan jáne t.b. memleketterdiń halyqaralyq uıymdarynyń ókilderi boldy.