Qoǵamdyq uıymdarmen kezdesýler turaqty túrde ótedi - Aıda Balaeva
Otyrys barysynda azamattyq sektordyń jańa zańnamalyq bastamalardy, azamattyq qoǵamdy damytý Tujyrymdamasyn, «Estıtin memleket» Tujyrymdamasyn, azamattyq qoǵamnyń el Prezıdentiniń Joldaýyn iske asyrýdaǵy jáne halyqpen keri baılanys ornatýdaǵy rólin talqylaýǵa qatysý máseleleri talqylandy, dep habarlaıdy QazAqparat mınıstrliktiń baspasóz qyzmetine silteme jasap.
Mınıstr úkimettik emes sektordyń tótenshe jaǵdaılar men karantın jaǵdaıynda halyqty qoldaý sharalaryn iske asyrýdaǵy úlesin atap ótti.
Aıda Balaevanyń aıtýynsha, mınıstrlik ashyqtyq pen azamattyq qoǵam ınstıtýttarymen tyǵyz ózara is-qımyl qaǵıdatyn ustanady. Halyqpen kezdesýler turaqty, ári salalyq negizde ótkiziletin bolady. Mınıstrlik memlekettik baǵdarlamalardyń iske asyrylý barysy týraly halyqtyń barynsha habardar bolýyna jáne azamattardyń osy baǵdarlamalarǵa qatysýyn erekshe nazarda ustaıtyn bolady.
«Úkimettik emes uıymdardyń qatysýymen júzege asyrylatyn Memlekettik organdar tarapynan josparlaǵan áleýmettik jobalar, qazaqstandyqtardyń suranystary men qajettilikterine negizdelýi kerek. Sonymen qatar, josparlaý, memlekettik áleýmettik tapsyrysty qalyptastyrý, memlekettik granttyq qarjylandyrý máseleleri ashyq bolýy tıis. Mınıstrlik halyqtyń ártúrli maqsatty toptaryn (erekshe qajettilikteri bar adamdar, NEET sanatyndaǵy jastar (bilimi men daǵdylary joq), kópbalaly otbasylar jáne t.b.) quqyqtyq, qarjylyq, sandyq saýattylyq pen daǵdylarǵa úıretýge baǵyttalǵan jobalardy ázirleıdi «, - dedi mınıstr.
Aıda Balaeva ÚEU otyrysta aıtylǵan barlyq usynystar eskerilip, mınıstrliktiń josparyna engiziletin bolady dep sendirdi.
Úkimettik emes uıymdar memlekettik organdarmen ózara is-qımyldy, volonterlyq jáne arnaıy áleýmettik qyzmetter salasyndaǵy zańnamany jetildirý boıynsha naqty usynystaryn bildirdi. Mınıstrliktiń ashyq dıalog pen birlesken jumysqa daıyn ekendigin atap ótti.
